‘Serchhip Chhim Veng Lei’ dawh thar hawn a ni ta

 Serchhip Chhim Veng panna kawng-a RCC Lei dawh thar, PC. Lalhmunmawia leh Liantluanga te In inkara mi chu nimin zing khan ZPM Serchhip Block President, V. Rozamliana chuan mipuite zawh theih turin Ribbon chep chatin a hawng.

‘Serchhip Chhim Veng Lei’ hawngtu ZPM Serchhip Block President, V. Rozamliana chuan he Lei dawh hawn theih a ni ta chu lawmawm a tih thu sawiin, Lei dawh that a nih theihna tura hma lak saktu Bialtu MLA leh Chief Minister Lalduhoma bakah tha taka hna thawktute chungah lawmthu a sawi bawk. Bialtu MLA leh Chief Minister hmalakna azarah Serchhip khawpui chhungah hmasawnna hna hrang hrang thawh a nih tawh thu leh hmalakna kal mek bakah la thawh mai tura ruahman engemaw zat a awm thu pawh ZPM Block President chuan sawiin, Serchhip by-pass pawhna tur kawng siamna tur chu tihfel a nih tawh thu leh he kawng atan hian Chhim Veng Lei hawn tak chu Serchhip chhuahka pawimawh tak a la nih dawn thu a sawi a. Lei siam a nih laia a helna kawng Kanan Veng atanga Chhim Veng panna kawng pawh tunhmaa Step ni thin chu MLA Fund hmanga Black Top-a siam a nih thu sawiin, Lei siam vanga rei tak kawng dan a nih chhunga dawhthei tak leh phunnawi lova nghak hram hramtu Serchhip Chhim Veng mipuite chungah lawmthu a sawi bawk.

‘Serchhip Chhim Veng Lei thar’ hawnna hun hi ZPM Chhim Veng Unit President Remlalliana chuan kaihruaiin Secretary, Rualchhawnkima hnen atangin Report ngaihthlak a ni bawk. He hna enkawltu PWD Serchhip-a hotute chuan he Lei dawh hna hi Hand Holding hnuaia thawh a nih thu leh Contractor chu T. Zapuithanga niin Agreement Amount chu Rs. 37,77,000/- a ni tih an sawi a. Lei chhuat hi meter 7-a sang niin meter 16-a thui niin Lei zau zawng hi ft. 10 a ni thung a, Concrete grade M25 niin kumin August 1 khan Lei dawh hna hi zawhfel a ni.