Serchhip District-a SCC kaltlangin Kumin-ah Sawhthing kg. 26,61,652 hralhchhuah a ni

 Kumin chhungin Serchhip District-a Secondary Collection Centre (SCC) hrang hrangte kaltlangin Sawhthing kg. 26,61,652 hralh niin hei hi cheng nuai 748 man vel niin,Sawhthing hralhna a that avangin SCC kaltlang lova Sawhthing hralhchhuah a awm nual bawk a ni.

Kumin-ah hian Serchhip District-ah kum hmasa aiin Sawhthing man hi a tha deuh niin a lang a, Serchhip District-ah hian sawrkar in Sawhthing hralhna turin Secondary Collection Centre (SCC) hrang hrang 8 siamin heng SCC hrang hrangah hian Sawhthing hralh tur bag 73,869 dahluh a ni a, heng te hi hralhchhuah vek niin a vaiin kg. 26,61,652 hralhchhuah a ni a, hei hi Rs. 7,48,51,395 man a ni.

Serchhip District-a SCC hrang hrangte zingah Thenzawl SCC atanga Sawhthing hralh hi tam berin bag 12,023 dahluh atangin kg. 4,86,881 hralhchhuah a ni a,Sawhthing hralh tur an dahluh tlemna ber SCC chu North Vanlaiphai SCC niin bag 4871 dahluh a ni a, heta tang hian kg. 3,58,216 hralh niin hemi atanga sum hmuh chu Rs. 84,26,895 a ni bawk.

Sawrkar tana Support Price pek ngai lo leh pek tam ngai lova hralh te pawh an awm bawk avangin kumin hian Sawhthing hralhna atanga sum hmuh hi a inang lo nasa hle a, Support Price pek ngai te pawh tunkar hian pek kim tum a nih thu tunhnai khan Agriculture Minister in a lo sawi bawk tawh a ni