Doctor phalna nen a Zu lei leh kawl phalna Serchhip-ah-'Red Card' dilna lut ala awm lo

 Mizoram sawrkar Excise & Narcotics Department in hriselna kaihhnawih vanga a mamawh te tana IMFL kawl leh zu in phalna 'Red Card' pekchhuah a tum ah nimin, July 1, 2026 thleng khan Serchhip District-ah 'Red Card' dilna form thehlut an la awm lo a, 'Red Card' neih tuma dilna Form lachhuak pawh an la awm loh thu Serchhip-a Excise & Narcotics Department hotute chuan LENKAWL an sawi bawk.

Tarlan tawh angin Mizoram sawrkar chuan Section 45 B(1) of the Mizoram Liquor (Prohibition) Ammendment Act, 2025 tlawhchhanin 'Red Card' hi pekchhuah a tum a, hriselna kaihhnawih thil avanga Zu kawl leh in phalna 'Red Card' permit dil duh tan Aizawl-a Comissionerate of Excise & Narcotics, Opposite Aijal Club leh District hrang hranga Excise & Narcotics Office-ah dilna form hi lak theih a ni a. Dilna form man hi Rs. 50/- niin Red Card hi a diltu hnena pek a nih chuan kum khat atan Rs. 5000/- an chawi a ngai dawn thung a ni.

Excise & Narcotics Department hotute chuan hriselna kaihhnawih avanga IMFL kawl leh zu in phalna 'Red Card' an pekchhuah turah neih a harsat tur thu sawiin, Red Card nei tur chuan Doctor te'n damdawi atana an chawhna lehkha an neih hnuah an awmna District Medical Superintendent ten an chawhna chhante en fiahin, phalna an pekte chauh Red Card hi pek an ni dawn tih an sawi a ni.