Kuminah ASF vangin Vawk sang khat aia tam Serchhip Districtah an thi tawh

Lawma Ralte • July 1, 2026 • Comments

 Kumin chhung hian Serchhip District-ah African Swine Fever (ASF) vanga Vawk thi chu sang khat aiin a tam tawh a, hri darh zel tur venna atan Vawk za ruk chuang suat a ni tawh bawk. Serchhipa AH&Vety Department ten an chhinchhiahna atanga a lan danin Serchhip District-ah kumin hian Vawk hri, African Swine Fever (ASF) leng avang hian Vawk thi a awm belh zel a, June 29, 2026 thleng khan khua leh Veng 18-ah ASF vanga Vawk thi leh suat hi awm tawhin chhungkaw 396 ten he hri avang hian harsatna an tawk tawh a ni. Kumin chhung hian ASF avanga Serchhip District-a Vawk thi hi a vaiin 1037 zet a ni tawh a, tunhnaiah Chhingchhip khua ah ASF vanga Vawk thi hi nasa taka rawn pung chhoin tunkar Thawhtanni thleng khan Vawk 142 zet a thi tawh a, Thawhtanni-ah khan Vawk thi 25 chhinchhiah belh a nih bakah Ngentiang khua ah Vawk thi 10 chhinchhiah a ni bawk.


ASF hri leng darh zel tur venna atana Vawk suat pawh Serchhip District-ah a awm belh zel a, tun thlengin khaw 18-ah hian Vawk 676 suat a ni tawh bawk a ni. Chhinchhiahna atanga a lan danin kumin hian Serchhip District-ah ASF vanga Vawk thi leh suat 1713 lai a awm tawh a, Chhingchhip chu hri leng tuar nasa ber ni mekin chhungkaw 41 te Vawk 142 a thih bakah 103 suat ni tawhin a vaiin Vawk 245 an chan tawh a. Serchhip Vengchung in dawtin chhungkaw 36 ten he hri leng hi tuarin Vawk thi 94 a awm bakah Vawk 118 suat a ni tawh a, a vaiin Vawk 212 an chan tawh bawk a. Serchhip P&E Veng-a chhungkaw 44 te Vawk 116 a thih tawh bakah Vawk 51 suat ni tawh bawkin a vaiin Vawk 167 an chan tawh a. Serchhip Kawnpui North ah chhungkaw 17 te Vawk thi leh suat 160 a awm tawh bawk.

Heng bakah hian Vawk thi leh suat za aia tamna khaw dang pali a awm a, ASF hri leng hian ziaawm lam ala pan thei meuh rih lo niin a lang.bawk ani.