Serchhip khawpui venhimna atana tangkai tura hmun hrang hranga CCTV dah dan tur sawiho a ni
Serchhip khawpui chhunga rukruk leh dan bawhchhiatna bakah chhiatrupna lo thlen thulha hman tangkai turin 'Eagle Eye Monitoring and Control System (EEMCS)' kalpui a ni dawn a, hemi atana tul leh pawimawh hrang hrangte chu nimin tlai khan Bawrhsap hova sawiho niin he hmalakna hnuaia CCTV Camera dahna turte pawh sawiho nghal a ni.
Serchhip Deputy Commissioner Office hmalakna in Project thar 'Eagle Eye Monitoring and Control System (EEMCS)' hi ruahman niin Ministry of Personnel (DARPG) chuan hei hi a remtihpui hnuah sanction a rawn pe a, he hmalakna kalpui dan tur hi nimin khan Serchhip-ah District Bawrhsap, Paul L. Khuma kaihhruaiin DC Meeting Hall-ah sawiho niin,he hunah hian Bawrhsap chuan he Project hi Serchhip mipuite himna tura hmalakna a nih thu sawiin, Chhiatrupna (Disaster) thilah leh rukruk leh dan bawhchhiatna hrang hrang thleng thinte beihletna leh invenna pawimawh tak tur a nih thu sawiin,Dan kengkawhtu Department-te leh khawtlang hruaitute nen tangrualin, khawtlang venhimna hmanraw pawimawh tak a nih ngei a beisei thu a sawi bawk a ni.
He thutkhawmah hian Serchhip DC Office-a SDC, Vanthangpuia chuan 'Eagle Eye Monitoring and Control System (EEMCS)' chungchang leh he Project kalpui dan tur tlangpui a sawifiah a. He hmalakna hnuaiah hian Chhiahtlang Kawn Veng bakah Serchhip Kikawn Veng leh Sailiamkwn inkar hmun 20-ah CCTV (5MP) Static leh Unstatic te dah a ni dawn a, khawlai lun lai, ruihtheih thil tihna hmun leh rukruk leh lirthei dan bawhchhiatna hluarna hmunah te, mipui nunau tana hmun him lo laiah te dah tura ruahman a ni a. Command & Control Centre chu Serchhip DC Office-ah dah a ni dawn a ni. Hmun hrang hrang 20-a CCTV dah tur bakah hian hmun ualau tha laiah LED Display Board pahnih (20x10 ft leh 16x9 ft) chu mipui ten Information leh thil pawimawh dang atana an hman tangkai theih tur dah a ni dawn bawk a. Heng thil pawimawh dahna tura rawtna hrang hrang awm te chu sawiho a nih hnuah Addl.Deputy Commissioner Dorothy Muansangi kaihhruai Joint Inspection Team siamin anni hian rawtna lut hrang hrangte leh mipuite chhawr tangkai theih zawkna turte a hmunah kalin an enfiah leh dawn a, he Team-ah hian Police leh khawtlang hruaitute leh tlawmngai pawl te telin an zirchianna te chu la thlirho leh tur a ni ang.
He thutkhawm ah hian Addl. DC Dorothy Muansangi leh District Superintendent of Police, Dhirendra Pratap Singh te bakah, Sub-Divisional Officer (Sadar) te, SDC te, SDPO te, DIPRO te, District Informatics Officer leh Excise & Narcotics Department aiawh te, Officer-in-Charge (Traffic) te, MJA eh khawtlang hruaitu VC leh YMA aiawhte an tel a ni.
