Mizoram Chief Minister leh Bialtu MLA ni bawkin Serchhip-a 'Sensitization Programme on The Mizoram Victims of Crime Compensation Scheme, 2011' hun a hmanpui
Serchhip District Legal Services Authority (DLSA) bultumin vawiin Dt.20th November 2026 tlai khan Serchhip DC Pisapui Hall-ah 'Sensitization Programme on The Mizoram Victims of Crime Compensation Scheme, 2011' buatsaih niin, he hun hi Mizoram Chief Minister leh Serchhip Bialtu MLA ni bawk Pu Lalduhoma chuan Khuallian niin a hmanpui a, Justice Michael Zothankhuma, Judge-in-charge Administration, Gauhati High Court & Executive Chairman, Assam State Legal Services Authority pawhin Khualzahawm niin a telpui bawk ani.
Chief Minister leh Serchhip Bialtu MLA ni bawk Pu Lalduhoma chuan thu sawiin, an sawrkar chhungin District Court leh High Court-a hnaruak tam tham tak dah khah ni tawhin, Post thar tam tak an siam tawh bawk tih a sawi a. Kum 2023 December atanga vawiin thleng hian District Judicial Infrastructure atana Central leh State share release tawh zat belhkhawm chu Rs. 3937 Lakhs a ni tawh tih a sawi a. Serchhip District Court pawh a lo changtlun zawk theih nan MJS Grade-I leh Supporting staff dah an rilruk mek tih sawiin,Champhai leh Aizawla Exclusive ND&PS Special Court din turin Judge leh Supporting Staff post ruahman fel a ni tawh thu te, District thar 3 - Khawzawl, Saitual & Hnahthial Court Building leh Judicial Quarters sakna tur hmun Sawrkarin a ruahman fel tawh thute a sawi bakah Kolasib-a Fast Track Court Building pawh sak zawh a nih tawh thu leh function theihna tura sum mamawh zat PWD-in an chhut mek tih a ni tih sawi bawkin,Mipui vantlang leh Mizoram Bar Association Sub-Headquarters, Lungleite ngenna ngai pawimawhin, Lungleia District Court Building sakna turin sorkarin Salem Veng, Lungleia IPR & PS ram ruahman sak a remti tih anih thu te a sawi bawk.
Victim of crime compensation atan hian an sawrkar hnuah Rs. 967.80 Lakhs an ruahman tawh tih Chief Minister chuan sawiin,Crime Compensation Scheme hi Section 375A of CrPC hnuaia kalpui thin niin, July 2024 atang khan Section 396 of the Bharatiya Nagarik Suraksha Sanhita (BNSS), 2023 hnuaiah a awm tak thu sawiin "Rorelna dik chuan thil sual titute hremna pekah duh tawk mai lovin, an thil sual tih tuartute tanpui leh chhawmdawl pawh a huam tur a ni" tih hi he scheme innghahna bulpui a ni a ti a,vawiina compensation dawngtute chu a lainat thu sawiin beidawng lo tura ngenin,taksa leh rilru hrisel tak nei zui turin duhsakna a hlan a,Mizoram chu he Scheme atanga zangnadawmna sem chhuah ngai ve lo state, state nuam leh ralmuang, mi sualte an ngampat lohna ram nih theih a duh thu sawiin, Mizoram mipui zawng zawngte chu heng sualna laka kan fihlim theih nan, chhungkua atanga bul tanin, uar taka heng suahsualna that lohziate hi lo inzirtir theuh turin a chah bawk ani.
He hunah hian Khualzahawm Justice Michael Zothankhuma leh District Bawrhsap Pu Paul L. Khuma ten thu sawi bawkin,Serchhip District Court-a Judicial Magistrate Pu H.T. Lalmawizuala hnen atangin The Mizoram Victims of Crime Compensation Scheme 2011 leh a kaihhnawih dan pawimawh dangte bakah,Pawikhawihna (crime) tuartute tana tanpuina leh chhawmdawlna awm thei chungchangte zir ho niin,zawhna leh chhanna hunte hman ho anih bakah,Serchhip District chhung khaw hrang hranga pawikhawihna tuartu (Victims of Crime) mi 20-te hnenah zangnadawmna sum Cheng nuai 53.7 sem chhuah a ni.
Vawiin hun hmannah hian Serchhip-a sawrkar department hrang hranga hotute, pawikhawina tuartute leh an chhungte bakah khawtlang hruaitute an tel a. Pi Julie Lalrinzami, Addl. District & Sessions Judge, Circuit Court, Serchhip chuan hun hi kaihruaiin, Pi Lalrochami Ralte, Chief Judicial Magistrate & Secretary, DLSA Serchhip-in lawmthu sawiin hun hi a khar a ni.
The Mizoram Victims of Crime Compensation Scheme, 2011 hi - tualthah, pawngsual, naupang khawihchhiatna, POCSO kaihhnawih, acid attack leh pawikhawihna dang tuarte leh an chhungte tan zangnadawmna pekna tura duan a ni a. A serious dan a zirin Rs. 50,000 atanga Rs. 3,00,000 leh a chunglang pek theih niin, District Legal Services Authority (DLSA) kaltlanga dil tur a ni a. Pawikhawihna thlen atanga thla 6 chhungin dil theih a ni.