Serchhip-ah piang leh thi (Birth & Death)chhinchhiah chungchangah District Level Coordination Committee an ṭhukhawm

Lawma Ralte • October 7, 2026 • Comments

 Vawiin Dt 7th October, 2026 khan Serchhip District Level Coordination Committee (DLCC) on Civil Registration System (CRS) chu an Chairman, District Bawrhsap leh District Registrar of Births & Deaths Pu Paul L. Khuma hovin DC Meeting Hall-ah an ṭhukhawm.


Serchhip Bawrhsap Pu Paul L. Khuma chuan birth certificate leh death certificate te hi chhinchhiahna pawimawh tak a nih bakah sawrkarin hmasawnna hna a thawhnaah pawh ruahmanna (plan) a siamna atana hmanraw pawimawh em em an nih avangin, a pek chhuah kawngah fimkhur a ṭul thu a sawi a. Chhinchhiana bu (register) te pawh digitize thlap a pawimawh thu sawiin, hma la zui turin thawktute a chah bawk ani.

Member Secretary leh Serchhip District Research Officer leh Additional District Registrar of Births & Deaths ni bawk  Pu Lalthangmawia'n report hrang hrang a sawi a. Serchhip District-a piang leh thite chhinchhiahna kalpui dan thlir ho niin, felfai leh ṭha zawka hma lak dan turte sawi ho a ni bawk.

He ṭhutkhawmah hian piang leh thite chu ni 21 ral hmaa CRS-a chhinchhiah fel leh thuneitute hnena report tur tih a nih angin Lunglei District chhunga sawrkar leh private damdawi inte dinhmun thlir ho niin, he inkaihhruaina hi ṭha taka an zawm zel theih nana hma lak dan turte sawi ho a ni a. Birth certificate leh death certificate diltute'n awlsam taka digital copy an hmuh theih nan an dilnaah phone number leh email ID tar lan tel a pawimawh thute sawi niin, Birth certificate leh death certificate lem siam leh tihdanglam chu dan phal loh a nih angin a venna tur leh certificate lem laka mipui himna tura hma lak dan tur te, inzirtirna hrang hrang kalpui dan turte sawi ho a ni bawk.

Birth/death certificate hi pian/thih ni aṭanga ni 21 chhungin Registrar of Births & Deaths (RBD) hnenah a thlawna lak theih niin, ni 22–30 inkarah ₹20/ chawiin RBD aṭangin lak theih a ni a; ni 31–365 inkarah chuan District Research Office/Additional District Registrar of Births & Deaths (ADR) office-ah fee ₹50/- leh application form man ₹20/- (a vaiin ₹70/-) chawia lak ngaiin,kum khat chin hnu lamah chuan District Magistrate/Executive Magistrate hriatpuiin fee hrang hrang a vaiin ₹220/- chawiin Delayed Certificate lak chhuah theih chauh a ni thung ani.