SERCHHIP DISTRICT BAWRHSAP HOVIN SERCHHIP-A SAWRKAR QUARTERS THAR ‘GPA’ LEH CIRCUIT HOUSE SAK MEKTE ENDIK A NI

Lawma Ralte • August 13, 2026 • Comments

 Vawiin khan Serchhip Distirct Bawrhsap Pu Paul L. Khuma hovin Serchhip Hospital Complex, Kawnpui leh P&E venga sawrkar quarters sak mek, department hrang hranga thawkten an luah theih tur ‘General Pool Accommodation’ te leh Khawtetlanga Circuit House sak mekte dinhmun endik a ni.


General Pool Accomodation (GPA) hi Serchhip kawnpui, Distirct Hospital bulah pakhat; Soil Department office bulah pakhat;  P&E Veng Leisekawt Field bulah pahnih sak niin a vaiin building 4 sak mek niin, Serchhip kawnpui ami leh P&E veng Leisekawt bula building pakhat zawkte hi 'Design B' tih niin chhawng 3 (Group A tan chhawng 2 leh Group B tan 1) leh Car te 5 hun theihna garage floor pakhat awma sak a ni a, P&E veng Soil deptt. bul ami leh Leisekawt Field bula pakhat zawkte hi 'Design A' tih niin chhawng 4 (Group A tan 3 leh Group B tan 1) leh Car te 5 hun theihna garage floor awma sak a ni bawk a. Buillding tinah hian tui dah khawlna (Water Tank) litre nuai 1 bakah floor tin luahtute tan sintax litre 2000 theuh dah a ni bawk. GPA building-te hi SASCI sum hmanga sak niin Treasury Office bul ami Design A building sak nan hian cheng nuai 344.74 ruahman niin Design B sak nan nuai 294.54 ruahman a ni a; Hospital Complex-a Design B building sak nan nuai 306.46 leh Soil deptt. bul ami Design A building sak nan nuai 351.94 ruahman a ni bawk. Tun dinhmunah 80% vel sak zawh tawh niin kumin October thla-a sak zawh fel hman beisei a ni.

Vawiin vek khan DC kaihhruai inspection team-te hian Khawtetlanga Circuit house sak hna thawh mek an tlawh nghal a, SASCI hmanga sak bawk niin a sakna atana sum ruahman hi cheng nuai 652 a ni a; VIP Room 2 leh mikhual Room 4 bakah Dormitory, Conference hall , Kitchen leh Dining hall te, Lounge leh Reception office te a awm dawn a, tun dinhmunah 60% vel hna thawh zawh tawh a ni.

Bawrhsap chuan hnathawktu Contractor-te hmalaknaah lawmthu sawiin, hun tiam chhung ngeia thawk zo turin a ngen a, building hrang hrang changtu Contractor theuhte chu, intihsiakna tha-ah ngaia, tha taka hna thawk zo hmasa ber nih tum theuh turin a fuih a ni.

Vawiina endiknaah hian ADC Pi Dorothy Muansangi leh SDO (Sadar) Pi Rebecca Laldinmawii Hrahsel te, SDC Pu Vanthangpuia te bakah PWD hotute, DIPR Serchhip leh MJA ten Bawrhsap hi an tawiawm a ni.