SERCHHIP DISTRICT-AH 'NATIONAL DEWORMING DAY 2026' HMAN DAN TUR REL NIIN, RULHUT HLO SEM RUNPUI NEIH A NI DAWN

   National Deworming Day (Rulhut hlo sem runpui neih ni) Serchhip District-a hman dan tur relin District Co-ordination Committee chu  nimin tlai (August ni 7, 2026) khan Serchhip Additional Deputy Commissioner Pi Dorothy Muansangi kaihhruaiin an thukhawm.

He thutkhawmah hian Senior Chief Medical Officer Dr. Lallawmpuii chuan rulhut hlo inpek pawimawh chhan hrang hrangte sawiin kum khatah vawi hnih - February leh August thlaah te rulhut hlo sem thin a nih thu leh, kumin February thla khan a thawh khatnaah hlawhtling taka Serchhip District-ah sem a nih tawh thu sawiin, Serchhip Deputy Chief Medical Officer Dr. Lallawmkimi Chhakchhuak hnen atangin National Deworming Day August 10 atana inbuatsaihna leh ruahmanna hrang hrangte ngaih thlak niin, tunlai Rulhlut hlo chhuakthar chu, thial chip emaw, chiah zawp emawa lem mai theih, eisual hlauhawm lo leh thil dang nen pawha inhal lo a nih thu a sawi a, a theih phei chuan mi tin tan, thla 6 dana ei chu duhthusam a nih thu sawiin ei nawn pawh a theih thu a sawi bawk.

National Deworming Day,Launching Programme hi August ni 10-ah Marian High School Serchhip-ah neih tur a ruahman niin,Serchhip district chhunga sikul hrang hrang, college leh Anganwadi centre-ahte rulhut hlo hi a huhova sem a ni ang a, Heta la ve hman lote leh sikul kal lote chu August ni 17, 2026 (Mop-Up Day) ah sem chhunzawm leh tur niin,Rulhut hlo (Albendazole) hi kum 1 leh kum 2 inkar naupangte hnenah 200mg (a chanve) pek tur niin, kum 2 chin chunglamte hnenah 400mg (a pum) pek tur a ni ang.