Ramchhung hmundangte rualin Serchhipah pawh 'Kristian Hla Bu Thar' hralhchhuah tan ani ta

 Mizoram-a Kohhran lian pahnih ten an hman ‘Kristian Hla Bu’ chu ramchhung hmundangte rualin  Synod Bookroom Serchhip Branch-ah pawh tunkar liamta Zirtawp Ni atang khan hralhchhuah tan niin,Synod Bookroom Serchhip Branch-a thawk te chuan Kristian Hla Bu hralhchhuah tur hi tun tumah hian a man tlawm ber chi (Ordinary) chauh ala rawn thleng tih an sawi a, Ordinary hi a kawm Plastic chi niin a bu lian ber chi bu 1000; a laihawl bu 1200 leh a te ber bu 1800 vel a rawn thleng tih an sawi a,A bu lian ber (large size) hi Rs. 350/- man niin a laihawl (Compact Size) hi Rs. 300/- leh a te (pocket size) Rs. 250/- a hralhchhuah tur a nih thu sawiin,tuna rawn thleng bak pawh hi Serchhipah rawn thleng leh nghal mai tura beisei a nih thu an sawi bawk a ni.

 Kristian Hla Bu tharah hian Hla 650 a awm tawh dawn a, Hla thar 70 belhin a hma a awm sa Hla 20 paih a ni thung a. Hla bu-a dah tharte hi tunlai hla leh thalai lamin an sak uar deuhte an ni ber tih a buaipuitute chuan sawiin,Hla bu thar chhutna atan hian Mizoram Synod chuan cheng nuai 70 a ruahman a. Mizoram-ah a chhut theih loh avangin Swapna Printing Press, Kolkata-ah chhut niin, KHB hi a tum khatna atan bu nuai thum chhut phawt a ni a, a tul ang zela la chhut nawn zel tura ruahman a ni bawk.