East Lungdar VC By-Election ah Vote thlak a ni

 East Lungdar Village Council-a General Seat ruak pakhat hnawhkhat turin Vawiin hian Vote thlak niin, zanin-ah Vote tla te hi chhiar nghal a ni ang.

East Lungdar Village Council-a Member pakhat, VC President nilai a boral tak avanga a Seat ruak hnawhkhat tur hian Vawiin hian by-election neih a ni dawn ta a, he inthlanna nei tur hian inbuatsaihna pawh peihfel ni tawhin nimin khan Serchhip DC Office atangin inthlanna atana hman tur bungrua te pekchhuah niin East Lungdar panpui a ni tawh a, nimin tlai-a thlenpui a nih hnuah tukin dar 7:00 atang hian mipui ten Vote an thlak tan a, boruak muanawm tak hnuaia inthlanna neih a nih theih nan venhimna pawh uluk taka ruahman niin Vote nei ten zalen taka Vote an thlak theih nan sawrkar chuan Vawiin hi East Lungdar VC huamchhunga awm te tan sawrkar Pisa chawlh ah a puang a ni.

He inthlanna neih turah hian tlai dar 5:00 thleng Vote thlak tura ruahman niin East Lungdar a Thangburha Hall-ah Polling Station siamin hetah hian Vote thlakna, Polling Booth pathum siam a ni dawn a, tlai dar 5:00-a Vote thlak zawhfel a nih hnu zan dar 7:00-ah Vote tla te hi chhiar nghal tura ruahman a ni a, Vote tla chhiarna atan hian Dawhkan panga (5) siamin Round 4-ah chuan Vote tla te hi chhiar zawh hman tura beisei a ni a, zanin hian result hriat nghal theih beisei a ni.

Tarlan tawh angin East Lungdar VC by-election neih turah hian Candidate pahnih awmin ZPM atangin F. Lalchawimawia leh Indian National Congress (INC) atangin Vansangliana te an ni a. East Lungdar VC-ah hian In 624 awmin Vote nei mipa 1112 leh hmeichhia 1248,an vaiin 2360 an awm. Tun dinhmunah Seat 7 awmah Member 6 awm mekin ZPM in Member pathum an nei mek a, MNF in Member 2 leh INC in Member pakhat neiin ZPM in Executive Body an siam a, tun tuma thlantlin a zir hian Executive Body siam thei pawh hi danglam thei a ni bawk.