DAN DIK LOVA FAMILY PENSION LATE TAN ‘SURRENDER’ TURA SAWRKAR THU CHHUAH CHUNGCHANG INHRILHHRIATNA SERCHHIP-AH NEIH A NI. SEPTEMBER NI 30, 2026 THLENG HUN HAWN A NI

 Vawiin Dt 14thAug 2026  khan Serchhip District Treasury Office huaihawtin Mizoram sawrkar hnuaia dan dik lova Pension late’n mahni duh thu (voluntary) ngeia an surrender na tur atana hun ruat chungchangte leh sawrkar thu chhuak pawimawhte inhrilhhriatna hun ‘Sensitization on Voluntary Surrender of Pension Payment Order’ chu Sub Headquarters YMA Hall Serchhip Bazar-ah buatsaih niin,Treasury Officer Pi Vanlalhmangaihi’n hun kaihruaiin Serchhip District bawrhsap Pu Paul L. Khuma ‘n khuallian niin hun a hmanpui.

He hun a Khuallian Serchhip Bawrhsap Pu Paul L. Khuma chuan Mizoramah dan dik lova pension late avangin kum tin sawrakrin sum tam tak a hloh bakah, a la tur dik tak ten an lak loh phah theih thu te, eirukna kawng khat a nih theih thute sawiin, hetianga dan dik lova Family pension late hi ‘mi thenkhat chu dan an hriat loh vangte a ni thei tiin’ he huna kalkhawmte chu  mi dangte hrilh chhawng tura tan rual a pawimawh thu a hrilh a; sawrkar hnathawk certificate pe chhuak thin te, VC, YMA leh kohhran hruaitu document (hriatpuina lehkha, baptisma certificate etc.) pe chhuak thinte chu dik taka ti thin turin a sawm bawk.

Resource Person Pu Laldinliana Sailo, A&AO, Accounts & Treasuries, Aizawl chuan hriattur pawimawh chi hrang hrangte sawiin Mizoram sawrkarin dan dik loa Family Pension late tan surrender na hun September ni 30, 2026 thleng a hawn thu a sawi a. He hun tiam chhunga surrender lote chu dan anga an chungah hremna lekkawh a nih tur thu leh surrender-te erawh chu an pension lo lak tawhte pawh ngaihdam niin thubuai siam sak an nih loh tur thu a sawi bawk. Chawhnu lamah a duh apiangte tan zawhna leh chhanna hun hman ho a ni bawk.

Mizoram sawrkar hnuaia dan dik lova Pension late’n mahni duh thu (voluntary) ngeia an surrender na tur atana hun ruat programme hi Miozram Chief Minister hovin July ni 15, 2026 khan State pum huap hemi chungchang inhrilhhriatna hun hi hman a lo ni tawh a, sawrkarin a ngaih pawimawh em avangin district hrang hrangah pawh Sensitization Programme hi hman vek tura tura tih a ni.