Serchhip Bawrhsapin Serchhip District-a raltlan awm te hnena sem tur buhfai 31789Kgs a vailiam
Vawiin Dt 10thJuly 2026 khan Serchhip Bawrhsap Pu Paul.L.Khuma chuan Serchhip District chhunga raltlan awm mek te hnena sem tur Buhfai 31789Kgs chu Serchhip DC Office Tual atangin a vailiam ani.
Serchhip District Bawrhsap Paul L. Khuma chuan Serchhip District chhunga raltlan te hnena buhfai sem tur chungchang ah hian tun thla ni 3 khan lehkha tichhuakin Serchhip District-a raltlan te tana sem tur Buhfai rawn thleng hi Sub-Hqrs. YMA hnuaia Branch hrang hrang ah semchhuah turin Sub-Hqrs. YMA ten buaipui a, Branch YMA ten raltlan list-an lak khawm te hnenah mi pakhat tan kg. 35 zel hisap a semchhuah ani dawn a. Sub-Hqrs. YMA Serchhip in a huam loh Baktawng leh Chhuanthar Tlangnuam huamchhunga raltlan te hnenah pawh buhfai sem tur hi Baktawng Branch YMA leh Chhuanthar Tlangnuam Branch YMA te kutah awmin, raltlan te hnena buhfai semchhuah hi July 24, 2026-ah chuan tihfel vek tura ruahman a ni bawk.
Sawrkar laipui ruahman anga raltlan te hnena Buhfai semchhuah tur atan hian Serchhip DC Office-a raltlan list awmsa chu tunhnai khan Serchhip Sub-Hqrs. YMA huamchhunga Branch hrang hrangte hnenah pekchhuah niin raltlan awm mek te nen enfiahna neih leh a ni a, hemi hnua YMA Branch hrang hrang ten Serchhip DC Office-a report an thehluh atanga a lan danin tun dinhmunah Serchhip District-ah raltlan mi 908 an awm anga chhinchhiah niin heng mite hnenah hian buhfai hi mi pakhat tan kg. 35 zela semchhuah tur anni dawn a, tun dinhmunah Serchhip District-ah hian YMA Branch 31-ah raltlan awm mekin, heng zinga mi 648 te chu Myanmar atanga raltlan niin Bangladesh atanga raltlan mi 239 leh Manipur atanga raltlan mi 21 an awm bawk a ni.
Raltlan List a lan danin Thenzawl Farm Vengah Raltlan tam berin 172 an awm a, Raltlan tlemna ber chu Khawbel khua niin 2 an awm thung a,Heng bakah hian Bangladesh atanga raltlan mi 239 te hi Thenzawl-a awm te vek anni thung a ni.
Serchhip District-ah hian YMA Branch 30-ah Myanmar atanga raltlan hi awmin a khua anga chhutin Sailulak-ah 4, Lungkawlh-ah 18, Lengah 22, N. Vanlaiphai-ah 39, Khawlailung-ah 7, Keitum-ah 11, Thenzawl-ah 107, Zote South-ah 4, Chhiahtlang-ah 8, Vanchengte-ah 5, Khawbelah 2, Mualpui Chhingchhip-ah 19, Baktawng-ah 62 leh Chhuanthar Tlangnuam-ah 58 bakah Serchhip-a Branch hrang hrang 11-ah mi 282 te an ni. Myanmar atanga raltlan rawn lut Serchhip a la awm te hi Serchhip Kawnpui South-ah tam berin 67 an awm a, Serchhip Chhim Veng-ah 46, Serchhip Darnam Veng-ah 41, Serchhip Chanmari Veng-ah 26, Serchhip Hmar Veng-ah 24, Sechhip Dinthar Veng-ah 19, Serchhip Field Vengah 18, Serchhip P&E Veng-ah 16, Serchhip Kawnpui North-ah 15, New Serchhip Bazarah 7 leh IOC Veng-ah 3 te an ni.
Lawma Ralte,DDNews Serchhip
