Serchhip Bawrhsapin in Solid Waste Management Centre(SWMC) sak mek leh Neihloh khaw thar tur a tlawh

 Serchhip leh Thenzawl-a Solid Waste Management Centre sak mek chu niminpiah khan Serchhip Bawrhsap, Paul L. Khuma chuan tlawhin Neihloh khaw thar kaina tur pawh a hmunah a tlawh nghal bawk.

Serchhip Bawrhsap hian Serchhip leh Thenzawl-a Solid Waste Management Centre (SWMC)sak mek te chu tlawh hmasa in hnathawh te a enfiah hnuah hnathawktute kawmin, chak taka hna thawh a nih theih dan turte a sawipui a; he hna hi mipui that tlanna tur, thil pawimawh (public interest)-a nih hre renga thahnemngai taka thawk tura chahin, bawlhhlawh sawngbawlna SWMC mumal taka a function thuai theih nan huntiam chhunga thawk zo thei turin a chah a ni.

 He hunah hian District Bawrhsap hi District Urban Development Officer (DUDO) Gaston Vanlalhriatpuia, Thenzawl SDO (Civil) K. Lalhlimpuia, Serchhip SDC C. Vanthangpuia leh Green Herd SP bakah Village Council hruaitu ten an tawiawm a ni. Hemi hnu hian Bawrhsap hian Serchhip District chhunga Neihloh khaw sawnna tura hmalakna kal meka an khaw thar kaina tur hmun chu a tlawh nghal bawk a, he hunah hian Village Planning Committee te nen an inkawmin hnathawh dante an en ho bakah harsatna awm thei chinfel dan turte rel ho a ni a. Bawrhsap chuan Neihloh khúa chu Model Village mawi tak ni tura ruahman (plan) a nih dan ang taka a chhuah theih nan tan hona a pawimawh takzet thu a sawi bawk a ni.