SERCHHIP-AH DISTRICT ELECTION OFFICER IN 'DRAFT ELECTORAL ROLL 2026' A TLANGZARH

 Mizoramah Electoral Roll thar atana hming inziahluhna Enumeration Phase hlawhtling taka kalpui a nih hnuin nimin July 4, 2026 khan Draft Electoral Roll tar chhuah a ni a, Mizoram hmun dangte rualin Serchhip District-ah pawh Draft Roll tar chhuahna hun hi District Election Officer Pu Paul L. Khuma hovin, DC Meeting Hall-ah hman a ni.

Serchhip Bawrhsap leh District Election Officer ni bawk Pu Paul L. Khuma chuan Electoral Draft Roll tarchhuah tura awm theih nana thawktute inpekna leh thawhrimna fakawm a tih thu a sawi a. May ni 20 atanga rim taka thawkin Draft Roll tarchhuah theiha peih fel a lo ni ta chu lawmawm a tih thu a sawi a. Final Roll atana inbuatsaihnaah a hmaa thawh hona tha tak awm sa vawng nung reng turin Political Party aiawhte leh khawtlang hruaitute a sawm a. Harsatna an nei anih chuan District Election Office chu tanpui turin an inhawn reng thu a sawi a. Draft Roll thar tlangzarhin, ERO te leh Political Party hrang hrang aiawhte hnenah a sem chhuak nghal a ni.

Pi Lalchhanhimi, Election Officer,Serchhip chuan Serchhip District-a Constituency hrang hrang - 26- Serchhip (ST) AC, 27- Tuikum (ST) AC leh 28-Hrangturzo (ST) AC ahte hian SIR kalpui a nih hma chiah khan electors mi 55,389 an awm thu sawiin, heng zingah hian Roll thar atana hming ziah luh theih tawh loh leh inziak lut duh lo (uncollectable) belhkhawm mi 1209 (2.18%) an awm a, chungte chu - mitthi tawh mi 647 (1.17%), constituency danga insawn/pem tawh mi 201 (0.36%), chinchang chhuizui theih tawh loh mi 144 (0.26%), already enrolled 186 (0.34%) leh sakhuana leh thil dang eng emaw avanga inziah luh duh lo mi 31 (0.06%) an awm thu a sawi ani.

Draft Roll thar dinhmun sawiin 26- Serchhip (ST) AC ah mipa 9625 leh hmeichhia 11050 an vaiin 20675 an awm a, 27- Tuikum (ST) AC ah mipa 8368 leh hmeichhia 8619 an vaiin 16987 an awm a; 28-Hrangturzo (ST) AC ah mipa 8097 leh hmeichhia 8421, an vaiin 16518 awmin, Draft Roll-a hming chuang 54180 an awm thu a sawi a. Inthunluh emaw, hming paih emaw, siam that duh emaw, address insawn duh emawte tan July 4 – August 4, 2026 chhungin ‘Claims & Objections’ hun hawn a nih dawn avangin ala danglam leh dawn thu a sawi bawk.

Draft Electoral Roll hi mahni bialtu BLO tinte hnenah leh DC Office, ERO leh AERO Office ahte hian office hun chhungin  en theih ani ang

Voter tinte chu Draft Electoral Roll-a kan hming a chuan leh chuan lohte lo inen a, lo ngaihven theuh tura ngen leh hriattir kan ni a. Draft Roll-a hming chuang lo palh emaw, qualifying date (1st July 2026)-a kum 18 tling tharte emaw chuan bialtu BLO-te hnenah dilna (Form 6) la chhuakin document thiltel ngaite nen theh luh leh tur a ni a, ECINET Mobile App emaw, voters.eci.gov.in emaw kaltlangin online-in mahniin a theh luh theih bawk.

Electoral Roll-a hming chuang lo tur chite hming lo chuang an awm a nih chuan, Form 7 hmangin paih tura dilna a thlen theih bawk a. Heng bakah hian hming leh address thlak duhte tan dilna (Form 8) la chhuakin siam that a dil theih bawk a ni.

Nimin a Draft Roll tlangzarhna ah hian Pi Rebecca Laldinmawii Hrahsel, SDO(S) leh ERO 27- Tuikum (ST) AC, Pi Lalchhanhimi, Election Officer, Pu K. Lalhlimpuia, SDO(C) Thenzawl leh ERO 26- Serchhip (ST) AC, Dr. Marylin Lalruatkimi, BDO E. Lungdar leh ERO 28-Hrangturzo (ST) AC bakah Political Party hrang hrang aiawhte, MJA aiawh leh tlawmngai pawl hrang hrang aiawhte an tel a ni.

One attachment  •  Scanned by Gmail