SERCHHIP-AH BLO LEH ABLO TE TAN 'POST DRAFT ACTIVITIES TRAINING' NEIH A NI

 SIR 2026 hmalakna kal mekah, Booth Level Officer (BLO) leh Additional Booth Level Officer (ABLO) te tan Draft Electoral Roll tarchhuah hnua hmalak zui zel dan tur thil pawimawh chi hrang hrangte inzirtirna - Post Draft Activities Training, DC Meeting Hallah nimin 20th July 2026 khan neih a ni. Training hi Election Officer Pi Lalchhanhimi hova neih niin Assistant Electoral Registration Officer & Master Trainer Pu Vanthangpuia'n a tel pui a ni.

July ni 4, 2026-a Draft Electoral Roll tar chhuah takah hming chuang lote hming thun belh emaw, paih ngai paih emaw, siam that duh emaw neite tan August ni 4, 2026 thleng hun hawn a ni a, hemi chhunga form chi hrang hrangte buaipuia, hmalak zui zel dan tur te leh BLO App hman dante bakah thil pawimawh chi hrang hrangte zirtir an ni.

Training hi 26 - Serchhip AC hnuaia BLO leh ABLO te puala neih niin vawiin khan 27 - Tuikum AC leh 28 - Hrangturzo AC amite tan buatsaih leh a ni bawk.