SERCHHIP DISTRICT SANITATION TASK FORCE TE THUKHAWM

 Vawiin  Dated 21st July 2026 khan Serchhip District Deputy Commissioner Pu Paul L. Khuma kaihhruainain, Serchhip Town Sanitation Task Force chu DC Meeting Hall-ah an thukhawm a; Member Secretary leh District Urban Development Officer Pu Gaston Vanlalhriatpuia bakah Task Force Member-te leh hmun hrang hrang atanga sawm bik khawtlang hruaitu mi thahnem tak meeting-ah hian telin, Serchhip district chhunga bawlhhlawh sawngbawl dan tur leh hmalakna hrang hrangte sawi ho a ni.

Meeting-ah hian New Serchhip VC area chhungah bawlhhlawhte, chi hrang hrang chi li – tawih thei, tawih thei lo, sanitary (diaper, pad etc.) leh Special Care (e-waste, chemical, damdawi chhia etc.) a thliar hranna '4-Way Segregation' kalpui dan tur te, Serchhip town area dangahte pawh '2-Way Segregation' (tawih thei leh tawih thei lo)-a thliar hranna kalpui dan tur chungchang te, Chhiahtlang North leh South VC area-ahte, urban area anga Green Herd SP-te nena bawlhhlawh sawngbawl dan tur leh hmalak zui dan tur chungchangte sawi ho a ni a. Heng bakah hian Serchhip, Thenzawl leh N. Vanlaiphai-a bawlhhlawh sawngbawlna hmunpui – Solid Waste Management Centre (SWMC) leh Solid Waste Segregation Centre (SWSC) sak hna thawh mekte dinhmun leh hmachhawpte sawi ho niin, SWM Action Plan hnuaia department hrang hrangte chanvo leh an hmalakna theuhte report (Action Taken Report) pawh en ho a ni bawk.

Vawiin thutkhawmah hian Serchhip-a SWMC sak hna thawktu Contractor – Lushai Corner, Luangmual, Aizawl te, Thenzawla SWSC sak hna thawktu Studio One Architect, Khatla, Aizawl leh N. Vanlaiphaia SWSC sak hna thawktu UD&PA Dte. aiawhte telin, report ngaihthlak a ni a, tarlan danin Serchhip-a SWMC hi kumin December emaw, nakum January emaw chhunga zawh fel vek hman tum niin, SWSC te pawh inkalpawhna kawng (approach road) tih loh chu zawh fel thawkhat a nih thu sawi a ni bawk.

Deputy Commissioner Pu Paul L. Khuma chuan Supreme Court thuchhuak angin SWMC/SWSC te hi hman theih a nih veleh district pumah '4-Way Segregation' chu chak lehzuala kalpui zel tur a nih thu sawiin, hnate tha taka hlen chhuah a nih theih nan, khawtlang hruaitu, mipuite leh sawrkar department tinte tanrual a pawimawh thu a sawi a, khawtlang nuam leh hrisel zawk neih theihna tura hmalakna a nih thu sawiin, he huna kalkhawm mi tinte chu mahni zawn theuhah thahnemngai taka thawk zel tura sawmin hun hi a khar a ni.