Serchhip leh E.Lungdar Block-a kalpui tur Integrated Tribal Dev. Programme hawn a ni

 Serchhip leh E.Lungdar Block-a kalpui tur Integrated Tribal Development Programme hawnna Serchhip DC Pisapui Hall-ah nimin khan neih niin, he huna khuallian Dr. KC Lalmalsawmzauva, Advisor to CM (Implementation of Handholding Policy) chuan Mizoram sawrkarin a kalpui mek Bana Kaih-ah Progress Partner atana thlangtute kan fair a, a dawngtute pawh in fair kan beisei  a ni, a ti.

Serchhip DC Pisapui Hall-a Integrated Tribal Development Programme hawnna ah hian Dr. KC Lalmalsawmzauva, Advisor to CM chuan Mizoram sawrkarin a kalpui mek Bana kaih hi a thlawna sem tawp nilovin project base zela hmalak a ni a, engtia kalpui nge kan tum tih hi ngun taka ngaihtuah thin tur a ni, a ti a, India rama District 802 zinga ziak leh chhiar thiam tamna ber an nih avangin kut hnathawktute lakah beiseina sang tak an neih thu sawiin Sum hi hmasawnna nena kalkawpah kan ngai thin a, sum ngah ringawt hi hmasawnna a ni ber lo a, hmasawnna chu rilru lam thil a ni a ti a, engkim hi taimaknain a hrinchhuah a ni a, keimahni theuhin kan zir a ngai a ni, tiin Progress Partner atana thlangtute kan fair a, a dawngtute pawh in fair kan beisei  a ni, a ti bawk.

 District Bawrhsap Pu Paul L Khuma pawhin thusawiin he project avang hian kut hnathawktute thar chhuah hi lo pung se a ti a, hlawhtlinna sawi tham nei theuh turin duhsakna hlanin, Department hotute pawhin an beneficiary te an hnathawhna hmunah enpui fo thin ni sela, chu chuan rah tha a chhuah ngei a beisei thu a sawi a ni. Pi Lalchhuansangi, Project Director, ATMA Serchhip District chuan Project kalpui dan tur leh hmalak dan tur tlangpui sawiin, NABARD Tribal Development Fund leh Mizoram CM Bana Kaih Scheme tangkawpa kalpui tur a ni a, Implementing Agency chu ATMA Serchhip District a nih thu a sawi. Project hi kum 6 chhung kalpui tur niin, sum sen tur hi Rs. 618,36,000 niin, NABARD share chu  Rs. 398,14,000 a ni a, Bana Kaih share chu Rs. 93,97,000 a nih thu a sawi bawk. Project hmalakna tur atan khaw 7 thlan niin Hualtu, Hmuntha, Khawbel, Sialsir, Serchhip, Chhiahtlang leh Thenzawl an ni a, Thlai chin tura an thlan te chu Tung leh Chhawhchhi emaw Bekang chin kawp tur niin, Ser (Lemon) leh Sawhthing emaw Behliang dal (Arhar) chin kawp tur a ni a, Litchi leh Lakhuihthei te chin kawp tur a ni dawn bawk a ni.

He project hnuaia tanpuina dawng tur hian mi 400 thlan an ni a, heng bakah hian Handloom and Tailoring Sector awm bawkin, hetah hian mi 100 thlan an ni bawk. Pu Lalrokunga Chhakchhuak, Dy. General Manager, NABARD chuan kuthnathawktute chu hlawhtling ngei tura theihtawp chhuah turin a sawm a, taimakna lo chuan hlawhtlinna a awm lova, he project a hlawhtlin nan chuan kan zavaia tanrual a ngai a ni a ti. Pi Vanramthangi, Director, Agriculture & Farmers’ Welfare Department pawhin thu sawiin sawrkar chu theihtawpin a tang tih sawiin,beneficiary te pawhin theihtawp lo chhuah ve turin a sawm a, harsatna an nei a nih chuan tanpui turin department lam an inring reng a ni, a ti.

 He hunah hian he Project hnuaia khaw hrang hrang atanga tanpuina dawng turte an tel a ni