Serchhip DC-in chawimawina, 'Namaste Award 2026' a dawng
Nimin (Sat.November 14, 2026) khan Serchhip District Deputy Commissioner Pu Paul L. Khuma (MCS) chuan 'Namaste Award 2026' a dawng a. Award semna, National Stock Exchange Atrium, Bandra Kurla Complex, Mumbai-a neihah, Maharashtra State Governor Jishnu Dev Varma chuan, he chawimawina hi a hlan a ni.
Amazing Namaste Foundation buatsaih, 'Namaste Award 2026' hi category 5-ah then niin, Pu Paul L. Khuma hian 'Public Service & Governance' category-ah chawimawina hi a dawng a. India hmarchhak ram hmasawnna leh sustainable development a awm theihna atana thawh hlawk tak, kalphung thar leh dangdai (innovative) hmanga entawn tlaka thawkte chawimawina niin, India hmarchhak state atanga he chawimawina dawng hmasa ber a ni.
He chawimawina dawng tur hian India hmarchhak state 8 atangin nomination call a ni a, State tin ten nominee tur thlangin Independent Panel hnenah submit a ni a, nomination tam tak zingah mi 6 thlitfim leh niin, ngun taka endikna neih a nih hnuah Pu Paul L. Khuma chu thlan a ni.
He chawimawina dawng tura thlangtu Panel member-te chu - Chairman, Former DG, BSF leh CRPF, Shri Sujoy Lal Thaosen, IPS (Retd) te; Mrs. Adv Delina Khongdup Raimaw - Former Member of National Commission for Women te; Mrs. Rosy Taba Gongo - Member, Arunachal Pradesh State Public Service Commission te; Mrs. Tara Doddihal - Marketing Consultant leh Shri Sunil Kumar Basumatary - Former Regional Co-ordinator, NSS North East te an ni.


