Serchhip-ah State Level EMRS Sports Meet, 2026 neih tan a ni

  Mizoram-a Eklavya Model Residential School (EMRS) School hrang hrangte infiamna a an inelna, 5th Mizoram State Level EMRS Sports Meet, 2026 chu nimin khan Serchhip Kawlri-a EMRS-ah neih tan a ni.

 Mizoram State Level EMRS Sports Meet vawi 5-na hi Serchhip Addl. DC, Dorothy Muansangi chuan hawngin zirna leh infiamna chu kal kawp tlat tur a nih thu a sawi a, zirlaite taksa leh rilru hriselna atan infiamna a pawimawh thu sawiin, EMRS zirlai kalkhawmte chu theihtawp chhuah a, infiammi rilru pu chunga tha taka intihsiakna hmachhawn turin a fuih a ni.

 Mizoram State Level EMRS Sports Meet hawnna hun hi Planning and Programme Implementation Department-a Mizoram EMRS Society Programme Manager, Lalhmingmawia Sailo chuan kaihruaiin inlawmna thu a sawi bakah he Sports Meet-a tel turte hian thutiam an la a, hemi hnu hian infiamna chi hrang hrangah inelna an nei nghal a ni.

 He Sports Meet-ah hian Mizorama EMRS School 11 te an tel kim thei a. Kum dangah chuan he Sports Meet hi State Society in a thleng thin a, tun tum hi School-in a thlen vawi khatna niin Football, Volleyball, Basketball, Athletics, Chess leh Table Tennis hmangin inelna neih a ni dawn a, tunkar Zirtawpni, Oct. 30, 2026 thleng neih tur a ni ang.