Serchhip District paltlangtu National Highway-02 thawmthat hna thawh lailawk dan leh Fur ruahtui tla a ziaawm hnua ‘Parmanent Repairment’ kalpui dan tur sawiho a ni.

 Serchhip DC Meeting Hall-a Serchhip Bawrhsap Paul L. Khuma kaihhruai a nimin (Dt 03/09/2026)tlai a thutkhawmah hian Serchhip District chhunga NH-02, Khumtung – Keitum inkar enkawltu NHIDCL hotute leh an hnuaia he kawng siam hna thawktu (Contractor) te bakah Serchhip-a VC, YMA leh thuthar thehdarhtute an tel a, he hunah hian kawng siamthat lailawk hna ‘Temporary repairment’ thawh zawh takte thlirletna neih niin Additional Deputy Commissioner Dorothy Muansangi hnen atangin nimin piah leh thla liam taa endikna lo neih tawh dan hrang hrangte report ngaihthlak a ni a; tun dinhmunah temporary-in kawng khuar zualpuite chu hnawh zawh tawh niin, lirthei tlan theiha siam that a nih tawh thu a sawi a. Package hrang hrang changtu Contractor theuhte’n Fur ruahtui tam zual a reh veleha ‘Parmanent Repairment’ an kalpui dan tur theuh te an sawi bawk.

 He thutkhawma telte chuan Contractor-te chu Permanent repairment hi October ni 1 atanga kalpui tan tura hriattirin, uluk taka vilzui reng an nih tur thu an hrilh a; kawng siam that hna thawk tur hian khaw tinah hnathawh viltu tur ‘Monitoring Team’ din tura rel niin, kawng khuar siam that dan turah pawh kawng chhe lai hi zauh, laih khuar belh leh thawm that dan tur Technical Specification/Guidelines ang thlapa tih tura ruahman a ni a, hetiang hian an ti ngei em tihte vilzui an ni dawn a, hemi atan hian Monitoring Team te chu Serchhip PWD ten Technical Support an pe dawn bawk a ni.

He thutkhawm kaihruaitu Bawrhsap Paul L. Khuma chuan kawng siamtu NHIDCL leh Contractor te chu kawngpui siam hna ngaihthah leh hnathawh that loh chu mipui pawisawina ‘public nuissance’; mipui nunna derthawnawma dahna a nih thu hrilh nawn lehin, hna an thawk tha lo a nih chuan BNSS leh DM Act te hmanga Danin thuneihna a pek angin khawng taka hmalak a nih tur thu a hriattir nawn tir leh bawk a ni.