Serchhip District chhunga Bank te hmalak dan thlirlet niin,Vawiin atangin an nuar tan.

 Serchhip District-a Bank hrang hrang ten kumin June thla tawp thlenga hma an lak dan te thlirin kar liamta Zirtawpni khan District Consultative Committee, District Level Review Committee, District Level Security Committee (DCC/DLRC/DLSC) thutkhawm neih a ni.

Serchhip DC Meeting Hall-a thutkhawm hi Addl DC, Dorothy Muansangi chuan kaihruaiin Govt. Sponsored Scheme hrang hrangNRLM, NULM, PMEGP, SUI, PMMY, KCC leh Social Welfare Scheme – PMJJBY, PMSBY leh APY hnuaia hmalaknate leh Bank hrang hrangte thawh that dan (performance) report ngaihthlak niin tanlak ngaihna laite sawiho a ni a. Sawrkar Schemes kalpui thin sawrkar Department hrang hrangte leh Bank-te inkara thawhhona tha zawk a awm theih dan turte leh Financial Literacy Camp- sum leh pai enkawl dan leh Bank kaltlanga sum khawl leh peipun dan inzirtirna chungchangte sawiho a ni bawk a. Bank Branch te him lehzualna tur chungchang te, Loan rulh that loh (NPA) awm thin tihtlem dan tur te, Community Based Recovery Mechanism (CBRM) kalpui dan te, Mobile Computer kaltlanga dan bawhchhiatna (Cyber Crime/ Fraud) awm thei laka inven dan chungchangte sawiho a ni bawk.

He huna tarlan a nih danin June 2026 quarter tawp thlenga Serchhip District-a Bank-a pawisa dahluh tawh chu cheng nuai 65000.41 a ni a, Bank-in loan a pekchhuah tawh cheng nuai 45319.31 niin Bank in sum an dawn atanga Loan an pekchhuah, Credit Deposit Ratio (CD Ratio) chu 69.72% a ni a, hei hian District chhungah sum chevel a tha tih entir a ni. Pradhan Mantri MUDRA Yojana (PMMY) hnuaiah June 2026 quarter tawp thlengin mi 96 hnenah cheng nuai 286.25 semchhuah a ni. National Rural Livelihood Mission (NRLM) hnuaiah Self Help Group (SHG) 19 hnenah cheng nuai 98.23 pek a ni a, Pradhan Mantri Jan Dhan Yojana (PMJDY) hnuaiah Bank Account 23,000 hawn tawh a ni bawk ani.

Vawiin atang khan Serchhip District chhhunga  Bank te pawh ramchhung hmundangte rualin  United Forum of Bank Unions (UFBU) leh All India Regional Rural Bank Employees Association ten Vawiin, September ni 28 atanga ni 30 chhunga rampuma Bank khara nawrh an tum chu kaltlangpui/thlawp ve nghal nghal bawk a ni.

He nawrhna hi September ni 11-a India Sawrkar hnena an thilphut an thehluh te tihhlawhtlin a nih loh vang niin,Kar khata ni 5 chhung Bank hawn (5 Day Banking) chu an thilphut langsar ber a ni a, tun dunhmunah Bank hnathawkte hian thla khatah Inrinni vawi 2-na leh 4-na an chawl a, Inrinni zawng zawng chu Bank chawlh ni ni tawh turin an phut a, an thilphut hi tih hlawhtlin a nih chuan nitin minute 40 dang thawh belh an inhuam a ni.