Serchhip District-ah African Swine Fever (ASF)avangin kumin hian Vawk thi 1103 zet a awm tawh

Lawma Ralte • July 16, 2026 • Comments

 Kumin chhung hian Serchhip District-ah African Swine Fever (ASF) vanga Vawk thi chu 1100 zet a tling tawh a, hri leng darh zel tur venna atan Vawk 800 chuang suat a ni tawh bawk.


 Kumin chhunga Serchhip District-a ASF vanga Vawk thi hi la pung zel mah se khaw dangah erawh a darh zui tawh rih lo niin a lang a, nimin thleng khan Serchhip District-a Veng leh khua 18-ah ASF vanga Vawk thi leh suat hi awm tawhin hri leng hi chhungkaw 433 ten an tuar tawh a, nimin thleng khan ASF vanga Vawk thi 1103 awm tawhin hri leng darh zel tur venna atan Vawk 880 suat a ni tawh bawk a, kumin chhung hian Serchhip District-ah ASF vanga Vawk thi leh suat hi 1983 a tling tawh a. Nimin bikah Chhiahtlang khua ah Vawk thi 5 chhinchhiah belh awmin Vawk suat belh erawh a awm lo a, Fur ruahtui a tlak tawh avangin ASF hri leng pawh hi ziaawm chho ve tawh tura beisei a ni bawk. Kumin chhunga Serchhip District-a ASF hri leng hi khaw mal-ah chuan Chhingchhip khua in an tuar nasa ber niin a lang a, tun thleng hian chhungkaw 58 ten tuar tawhin Vawk thi 179 a awm bakah Vawk 268 suat ni tawhin Vawk 447 zet an chan tawh a,Serchhip Vengchung chuan dawtin chhungkaw 36 ten tuar tawhin Vawk thi 94 leh vawk suat 118 lai a awm tawh bawk a. Heng bakah hian Vawk thi leh suat za aia tam awmna khua/Veng 7 awmin chung te chu Serchhip P&E Veng (167), Serchhip Kawnpui North (165), Chhiahtlang (120), Serchhip Chanmari (114), Serchhip Kawnpui South (110),Serchhip Darnam (108) leh Serchhip Dinthar (105) te anni.