RAMCHHUNG HMUNDANGTE RUALIN SERCHHIP-AH PAWH KUMIN 'INDEPENDENCE DAY -2026' LAWM DAN TUR REL ANI

Lawma Ralte • July 16, 2026 • Comments

 Vawiin Dated 16th July 2026 khan Serchhip Deputy Commissioner Pu Paul L. Khuma hovin Serchhip a kum 2026 Independence Day lawm dan tur, DC Meeting Hall-ah rel a ni a. Department hrang hrang hotute bakah khawtlang hruaitu Village Council member leh tlawmngai pawl hruaitute an tel a ni.


Kumin Independence Day Serchhipa lawm turah hian Minister Pu Lalnghinglova Hmar chu khuallian a ni dawn a. Serchhip Sports Complex-ah zing dar 10-ah programme tan tur niin Serchhip DIPR Office chuan mipui, a duh apiangte’n Independence Day lawmna, TV leh Youtube kaltlanga an en theih nan live-in DIPRO Serchhip youtube channel kaltlangin an pechhuak dawn a ni.

Kumin Independence Day lawmnaah hian march past-a tel tur zingah school contingent 15 leh NCC Govt. Serchhip College-te tel thei tura beisei an ni a. Kum danga tih thin angin he ni pual hian Serchhipa Orphanage Home, Observation Home, Hospital leh Jail etc. ahte thilpek sem a ni leh dawn bawk a; Independence day pualin Football, Tennis leh Table Tennis Tournament te neih a ni dawn bawk. Independence Day lawmna programme neih zawhah DC Bungalow-ah VIP’s at home neih a ni bawk ang.

Vawiin thutkhawmah hian department hrang hrangte chanvo leh mawhphurhnate sawiho niin Serchhip District Deputy Commissioner Pu Paul L. Khuma chuan ram leh hnam tana thawh hona tha neih a pawimawhzia sawiin hun a khar a ni.