Geology & Mining Department-a mithiam ten Serchhip-a leiminna hmun hrang hrang te an enfiah

 Tunhnai Fur ruahsur nasa avanga  Serchhip khawchhung lei che thin leh hemi avanga harsatna thleng thin te, heng lei che thin te venna atan hmalak sak tura Serchhip Sub-Hqrs.YMA  hruaitu ten Bialtu MLA leh Chief Minister ni bawk Pu Lalduhoma hnena an lo ngen tawh na chu Chief Minister chuan bawhzui sak nghalin,Serchhip khawpui chhung Veng hrang hranga lei che thin te chu zirchiang turin  nimin khan Serchhip-ah Geology & Mining Department atangin Sr. Geologist Benjamin Roluahpuia bakah Malsawmkima, Geologist bakah Lab. Technician Henry Lalchhuankima bakah thawktu dangte lokal te chu  Serchhip DC Office atangin SDC Vanthangpuia leh Sub-Hqrs. YMA Serchhip hruaitu ten lo dawngsawngin Serchhip khawpui chhung hmun hrang hranga leimin thin te chu a hmunah tlawhin an enfiah a ni.

 Geology & Mining Department atanga lo kal te hi Team pahnih-ah insiamin Team pakhat hian tunhnaia Serchhip P&E Veng-a lei che leh chhungkaw panga lai ten an chenna an rauhsan mek chu tlawhin leilung dinhmun te an enfiah bakah leimin thlenna chhan tlangpui nia lang te an enfiah a, hemi hnu hian Serchhip Bazar Hnuai-a nikum lama lei khi awmna hmun te an tlawh bawk a. Team pakhat te hian Serchhip Hmar Veng leh Leisang Veng inrina vela lei che thar awmna leh nikum lama Serchhip Field Veng-a leikhi awmna bakah Serchhip Chhim Veng mawnglam-a lei chetna hmun te an enfiah a. Hemi hnu hian Team pahnih te hian nikum lama Serchhip Dinthar Veng-a lei chetna hmun leh Serchhip leh Keitum inkara leimin lian tham deuh awmna te an tlawh bawk ani.

Geology & Mining Department-a mithiam (Geologist)te hian an thil hmuhchhuah ang ang te sawrkar-a an thehluh dawn bakah,hmalak dan turah rawtna pawh an siam nghal tur thu an sawi a ni.