MJA (SD) ten Serchhip-a Power supply khaihlak thin chungchang P&E Department hotute an sawipui
MJA Serchhip District Member te hi Serchhip Power Division-a Executive Engineer (EE), Er. Lalramnghaka chuan lo dawngsawngin MJA Serchhip District hruaitute chuan hun engemaw chen kalta atang khan Serchhip khawpui chhungah Power Supply a mumal loh thu leh a bik takin electric khawl hmanga hnathawk thin ten harsatna an tawh nasat thu leh Power Supply pek leh pek loh inchhawk zing lutuk avanga electric khawl thenkhat chhia, man to tak taka siam ngai te pawh a awm phah nia an hriat thu sawiin, heng harsatna te hi sutkian tul an tih thu leh hemi atana Department in harsatna an neih te a awm a nih chuan sutkianna tura hmalak a tul thu te an sawi a. He inkawmna ah hian Serchhip Power Division huamchhunga SDO leh JE te pawh tel tura beisei an nih anga telin an huamchhunga Power supply khaihlak nia sawi chungchang hi an sawifiah a. Serchhip Power Divsion-a Er. Lalramnghaka chuan Power Supply mumal taka a kal dan tur pangngai ang ni lova a kal hian vanduaina leh chhiatna nasa zawk a thlen phah theih thu leh nikum lamah pawh khawchhunga Electric Transformer chhia tam tak a awm avangin Serchhip khawpui chhungah Molded Case Circuit Breaker (MCCB) an hman thar thu a sawi a. MCCB an hman hnu hian Transformer in load a lak tur aia tam a lakin a lo trip tak thin thu leh hei hi power hman tam lai, a bikin tlai lamah te a tam zual tak thu a sawi a. Hemi sutkian nan hian Phase semrual lamah hmalak a nih thu leh Phase semrual tur hian LT Line-ah lawn te a tul thin thu leh hetiang ti tur hian tlai lam, Power mamawh san lai a tul bawk si avangin shutdown lak thin a tul tak thu pawh a sawi a. MCCB hman hnu hian khawilai Veng emaw-a complain awm ah hna an thawh dawnin a Feeder pum-a off ngai thin kha a ngaih tawh dawn loh thu a sawi a ni.
Hei bakah hian Er. Lalramnghaka chuan Power khaihlak tam tak chu Power kan lakluhna lama harsatna a awm thin vang a nih thu pawh sawiin, hemi sutkianna atan pawh hian kawng hrang hranga hma an lak thu leh ruahmanna an neih thu te pawh a sawi a, LT Line leh Power Supply pekna hmanraw hlui tawh lutuk pawhin harsatna a siam thu sawiin, heng te pawh hi thlak tura hma an lak chhoh mek thu te pawh a sawi bawk a ni.
P&E Department hotute chuan tun dinhmunah Serchhip khawpui chhungah Electric Transformer 26 a awm thu sawiin, ni tin complaint pawh 10 vel dawng ang an nih thu sawiin, heng hna an thawh dawn hian power supply a khailak thin dan te pawh an sawi a. Tunhnaiah eirawngbawlna Gas harsa avangin Electric Heater leh Induction Stove lam chi te hralhchhuah a tam hle tih Serchhip-a dawr hrang hrang an zawhfiahna atanga a lan thu pawh sawiin, heng te hi eirawngbawlna atana kan hman nasat tak avangin kan Power mamawh a san theih thu leh hei vang hian eirawngbawl hun laiin MCCB te chu a lo trip phah ta thin nia a lan thu te an sawi bawk.
Tun dinhmunah Serchhip Power Division huamchhungah mamawh san lai berin kawlphetha MW hnih (2) vel mamawh ang kan nih thu pawh P&E Department-a thawktute chuan sawiin, chhiatna thleng thut te a awm a nih loh chuan Power indaihlohna ang kha a awm tak loh thu pawh an sawi a, Serchhip Bukpui 132 kV Sub-Station a Transformer lian pali (4) awm te chuan kan mamawh min phuhruk mek thu pawh sawiin, Veng hrang hrangah LT Line te thlun belh zel niin Transformer te pawh bun belh zel a nih avangin harsatna thleng thin te pawh hi tlem chho zel tura an beisei thu an sawi bawk a ni.
