Serchhip District chhung East Lungdar Tuipui zau-a Serchhip District KVK, North Vanlaiphai ten enchhinna neia Lentil Dal an chin chu nimin khan Agriculture Minister C. Lalrinsanga hovin seng a ni a. Dal chingtute chuan nasa zawka hmalak a chakawm an tih thu an sawi bawk.
Tuipui zau-a hemi puala inkhawm neih ah Agriculture Minister chuan KVK Serchhip District ten Lentil Dal chin dan lehkhabu (Technical Bulletin) an buatsaih chu tlangzarhin, “Ka vei em em thin Dal sengna hun duhawm tak an hmang thei leh hlawk takin kan ramah kan thar thei a ni tih kan hmu hian min tilawm em em a, Vawiin-ah chuan enchhin mai kan la ni,” tiin tam thama kan thar theih nan a chin dan chipchiar a bu-a KVK ten an siam chu lo hmang tangkai turin loneitute chu a chah a. Dal mai nilovin Alu te pawh chin pun zel tumin hma an la tih sawiin, State dang atanga kan lakluh, kan tharchhuah ve theih reng si te tharchhuah kawngah hma kan la chho zel dawn a ni, a ti.
Tuipui Zau-a loneituten Custom Hiring Centre hnuaia Tractor an dilna pawh a theih anga a lo ngaihtuah sak tur thu Agriculture Minister chuan hrilhin, hmun thenkhata Custom Hiring Centre hminga Tractor an pek, mimal in ama hminga Subsidy sum a lo pek avanga mahni mimal ta anga chei zuia, midangte tana hman ve remchang lova siamtute an zawnchhuah vek tur thu leh a tul anga an chunga hmalak zui dan an dap tur thute pawh a sawi a. Tuipui Zau-in Land Development te, Irrigation te a mamawh hle tih a Mit ngeiin a hmuhpui tih sawiin, a tul anga ngaihtuah sak zel a tum thu a sawi bawk. Agriculture Minister hian loneituten him taka an thlaite a enkawl theih nan Bio-Control Laboratory an din mek tih pawh sawiin, leitha lam pawh kan mamawh ang tak kan siam ve theih nan Bio Fertilizer Production Unit din mek a ni tih a sawi a. Dawn tur awm thei chin dawnga duh tawk mai loneitu ni lova, ram tana engemaw thawhchhuah tum tlattu nih tuma, taima taka bei sauh sauh turin mipuite chu a ngen bawk.
KVK North Vanlaiphai-a Sr. Scientist & Head Dr. T. Vanlalngurzauva kaihhruai he hunah hian KVK-a SMS Kenny Zohming-liana chuan Lentil Dal an chin dan sawifiahin, Agriculture Minister in enchhin tura a duh angin Dal chi tha, Mizote tana chin tlak tur dapin Dal chi hrang panga (5) chu loneitu tha nia an hriat, Lungchhuan, Chekawn, N. Vanlaiphai leh E. Lungdar khua atanga thlanchhuahte nena tangho in an enchhin tih a sawi a, “Kan thawhpui loneitute inpeknaah kan lawm hle a ni,” tiin heng Dal chi hrang hrang an enchhinah hian IPL 220 Variety chu loneitute chin atan a thar thain a hlawk ber tih a sawi a. Kum hmasa lama WBL 77 variety an lo chin chhin tawh chu leitha leh a mamawh te pe vekin India ram pum tharchhuah zat chawhrual aia sang zawkin KVK Serchhip hian a lo thar tawh a. Tun tuma an seng takah erawh hi chuan leitha leh a mamawh dang engmah pe lovin an ching thung a, a tharchhuah pawh tlemin a tlahniam a, National avarage hi a phak lo hlek thung a ni.
He hun hman ah hian Agriculture Department Director James Lalsiamliana chuan Agriculture lama tui em em Minister kan neih zarah hmasawnna kan hmu nasa tih sawiin, tuna hlawhtling taka kan seng Dal pawh hi a remhriatna zara an neih a ni tih a sawi.
Dal chingtu C. Biak-thansanga pawhin kan ramah hlawk takin Dal kan thar ve thei tih kn hmu hi a lawmawm hle tih a sawi a. “Buh nen a intibuai bawk si lova, zau tak leh lian tham taka chin theihna E. Lungdar leh a chhehvel khuaah te a awm bawk a. Nasa zawka hmalak chhoh zel a chakawm hle a ni,” a ti bawk.
He hun hman ah hian East Lungdar BDO H. Lalhruaitluanga leh VCP East Lungdar K. Lalngaizuala te pawhin thu an sawi bawk
Comments
Post a Comment