Vawiin (30.1.2021) chawhnu dar pm khan MJA, Serchhip District chuan Serchhip Press Club-ah District Annual Conference hmangin Serchhip District Bawrhsap Kumar Abhishek, IAS chuan khuallian niin hmanpui a ni.
Hun khatna C.Ramengmawia kaihhruaiah hian khuallian, Kumar Abhishek chuan thusawiin, thla 7 chhung Serchhip District-a a thawh chhungin Serchhip District MJA member-te nen thawhhona tha tak an neih thu sawiin, Serchhip Press Club sak a ni leh hawn a ni ta chu lawmawm a tih thu a sawi a, Press Club chu Serchhip District nghawr tur thil pawimawh leh hmasawnna tur thil thar chhuahna hmun a la nih ngei a beisei thu a sawi. District Bawrhsap chuan media-te chu democracy-ah hna pawimawh tak an thawk tih sawiin, mipui leh sawrkar thlunzawmtu pawimawh tak an ni tih a sawi a, sawrkar hmalaknate mipui hriat tura an puan chhuah bakah, khawtlang mipui harsatna leh mamawhte an zir bawk a ni a ti a, democracy ramah hian media chak, zalen leh tihbik neilo a awm loh chuan democracy hian awmzia a nei lo a ti bawk. Kumar Abhishek chuan Social media-ah information a tam a, a dik leh dik loh thliar a har a, hetah hian media te mawhphurhna a sang hle tih a sawi bawk. State leh district-a media-te hnathawh chu ropui a ti takzet tih sawiin, sawrkar nen thawhhona tha tak an neih chhunzawm zel chuan a tha zawngin mipui nunphungah hmasawnna a thlen zel a beisei thu a sawi bawk.
MJA Gen Hqrs atanga hun hmanpui tu Pu. Zonunsanga Khiangte, President, MJA Gen. Hqrs. chuan Serchhip Press Club thara Annual Conference hman a ni thei ta chu lawmawm a tih thu sawiin, pawn lam atanga Press Club sakna atana puihna an dawn piah lama District MJA member-te inpekna leh an tha thawhna chu entawntlak a tih thu a sawi a. MJA Serchhip District-ten Covid-19 hri leng chunga project site visit an nei thei chu lawmawm a tih thu a sawi a, project site visit hi uar deuh deuh tha a tih thu a sawi a, hei hian hmasawnna hna thawh a tikal chak a, hnathawh langtlang a siam a, Journalist-te hriatna a tipung bawk a, Journalist-te hriatna a pun chuan a hlawkna teltu chu mipuite leh sawrkar an ni tih a sawi bawk. Tunlai khawvelah smart phone kan hmang nasa tawh a, thil chhiar nan pawh kan hmang nasa a, mahse print chhuah ngei chhiar chu hriatna a nghet bik a, chuvangin lehkha chhiar chu uar thar a tul a tih thu a sawi a, MJA Gen. Hqrs. president chuan Journalist pension leh Aizawl-a Press Enclave sak tur atana hmalakna te a sawi bawk.
Kapliana Pachuau, President, MJA, Serchhip District chuan social media hmasawnna a chak tawh a, social mediaah chuan duh duhin an sawi a, an ziak a, an thehdarh a, mahse thu dik lo leh rintlak loh an ziak avangin police man, thubuai nei leh jail tang an tam tawh tih sawiin, mipui hian thudik leh rintlak ziak ṭhin Journalist te an la zawng reng a ni a ti a, social media-a Journalist post leh comment chu dik turah mipuiten an la ngai a, chuvangin ziaka mipui chhiar theih tura kan dah dawn chuan finfiah hmasa phawt ṭhin turin MJA member-te a chah a, chumi tur chuan taimakna leh mi baka thawhrim a ngaih thu a sawi a, chu chu Journalist te zahawmna innghahna a ni tiin hmasawn zel tum ṭheuh turin a sawm nghal bawk a ni.
He hunah hian H.Lalbiakzavi, Secretary, i/c Finance, MJA, Serchhip District-in hunserh hmangin, T.Biakchamliana, Gen. Secretary, MJA, Serchhip District hnen atangin kum kalta chhunga an chetvelna report ngaihthlak niin, R.Lalmuansanga, Treasurer, MJA, Serchhip District hnen atangin sum report ngaihthlak a ni bawk.
Hun hnihnaah Kapliana Pachuau, MJA, Serchhip District kaihhruainain rorelna neih a ni bawk.
Tun dinhmunah Serchhip Disrtrict-ah hian MJA member 14 an awm mek a ni.
Comments
Post a Comment