Serchhip-ah Ruihhlo sim ta te pualin thiamthil inzirtirna hun buatsaih a ni

  Vawiin Dt.21st October,2026 khan Serchhip DC Office leh LESDE Department tangkawp buatsaihin NMBA Chhanchhuahna Camping atanga ruihhlo sim tate pualin 'Skill Development & Livelihood Reintegration Programme'hawnna inkhawm hi DC Pisapui Hall-ah neih niin,Additional Deputy Commissioner Pi Dorothy Muansangi'n a kaihruai a, Serchhip District Bawrhsap Pu Paul L. Khuma'n  khuallian niin hun a hmanpui a ni.

Bawrhsap Pu Paul L. Khuma chuan NMBA Camping leh ruihhlo dona kawnga Serchhip mipui, NGO, VC leh Kohhran hrang hrangte thawh hona-ah lawmthu sawiin, MBOCWWB, LESDE Department te thlawpnaah lawmthu a sawi a. NMBA Camping leh Skill Training te buatsaih a nih chhoh dan sawiin, 'mi pakhat tal pawh chhanchhuah an nih theihna tura hma lakna' a nih thu a sawi a. Beisei aia tam, mi 21 zet trainees an awm thei chu lawmawm a tih thu leh mi tinin hringnunah sual do (fight) kan nei vek a, ruihhlo simtate chu an beih lai hmelma hnehtu 'Pasaltha' an nih thu sawiin, hneh zel tur leh hnung tawlh lo tur te, anmahni hual veltu environment tha lo laka inthiarfihlim tur leh mahni inthunun theihna vawng nung zel a, hma sawn zel turin duhsakna a hlan bawk a ni.

Vawiin hun hmannaah hian New Serchhip Presbyterian Church Pastor Rev. Zairemkima'n hunserh a hmang a, Ruihhlo Ngai Pual Camping Organising Committee Vice Chairman Pu R. Sanghmingthanga leh Certified Trainer Pu Malsawmkima ten thu an sawi bawk.

Kumin February 2026 khan Ruihhlo Ngai pual Camping Serchhipah buatsaih a lo ni tawh a, mi 500 vel lutin,he camping atanga ruihhlo sim zui zelte pual hian Skill Development Training hi buatsaih niin DIPRO Hall, Serchhip-ah ni 13 chhung, Electric Wiring chungchanga thiamthil pawimawh chi hrang hrangte zirpui an ni dawn a ni.

He hun hmannaah hian Department hrang hrang hotute, Kohhran hrang hrang hruaitute, VC leh YMA hruaitute an tel a; SDO Sadar Pi Rebecca Laldinmawii Hrahsel-in lawmthu sawiin hun a khar a ni.