Disaster chungchanga hriattur pawimawhte zir hona Serchhip-ah neih a ni

 Vawiin Dt.22nd October, 2026 khan DC Pisapui Hall, Serchhip-ah Serchhip District Disaster Management Authority huaihawtin 'District Level Seminar on Disaster Management' neih a ni a, Additional Deputy Commissioner Pi Dorothy Muansangi’n kaihruaiin District Bawrhsap Pu Paul L. Khuma chuan he hun hi a hmanpui a ni.

Serchhip Bawrhsap chuan he Seminar kaltlang hian mipuite hnenah Hriatna Ralthuam inhlan tum a nih thu sawi a, he huna kalkhawm mipuite chu, an thil zir chhuahte hmang tangkai a, khawtlang hmasawnna atan leh hre lo zawkte hnena eng chhi darhtu nih tum theuh turin a chah a ni.

Professor Dr. Laldinpuia, Department of Geology, Mizoram University chuan 'Structure and Nature of Slopes, Slope Instability' tih leh 'Mitigation and Preventive Measures' tih thupuite hmangin thu a sawi a; SDO (Sadar) Pi Rebecca Laldinmawii Hrahsel-in SDRF/SDMF chungchang sawiin, Disaster kaihhnawiha sum ruahman leh a hman dan tur hriat tur pawimawh chi hrang hrangte a sawi bawk a; Sub-Deputy Commissioner Pu Vanthangpuia'n ‘Office Disaster Management Plans’ chungchang a sawi bawk.

.Tarlan danin Serchhip District chu Tlak-lung leh lung kelha (lungno leh keh hma) tamna a ni a, district area zaa 79 chuang mah hi lei hnuai tui, tuihna awm theihna a ni a;lei min leh lei nghet lo awm theihna a tam avangin in sa tur leh construction work thawk tur te chuan mi thiamte rawn nachang hriat a pawimawh thu sawi lan a ni.

Vawiin hun hmannaah hian Department hrang hrang hotute, Serchhip District chhunga khaw hrang hranga VC hruaitute, college zirlaite leh serchhip mipui eng emaw zat an kalkhawm a, zawhna leh chhanna hunte hman ho a nih hnuin SDC Pu Vanthangpuia'n lawmthu sawiin hun hi a khar a ni