Serchhip Town Jt. VC ten VB-G RAM G-ah mipui contribution tihsan an rel

 Serchhip Town Joint Village Council chuan MGNREGS hlawh aṭanga mipuiten contribution an thawh thin chu VB-G RAM G-ah hlawh leh kum khata hnathawh ni tih tam a nih tak avangin contribution chu ni khatah a hniam berah Rs.100/- ni tawh turin a rel.

 Chhiahtlang North VC Hall-a Serchhip Town Joint VC te nimina ṭhukhawm hian he thu hi relin, NREGS thlaktu VB-G RAM G-a ni khat hlawh chu Rs.300/- a lo nih tak avang leh ni 125 lai hna thawh tur a nih tak avang te, VC-ten hmasawnna hna thawhna tur, khawtlang tuam hlawmna tur sum an mamawhna a sân avangin beneficiary tin hnen aṭanga contribution ni khata Rs.80/- lak/cut ṭhin chu a hniam berah Rs.100/- lak/cut ni tawh se tiin an rel a ni.

Serchhip Town Jt. VC chuan an huamchhunga VC-ten contribution inang tlanga lak a nih theih nan kum 2020-ah Rs.80/- ni turin an bituk a, hemi hma lam hian VC ṭhenkhat chuan Rs.80/- aia tam hi contribution-a cut pawh an lo awm tawh niin thudawnna chuan a sawi bawk.

Nimin a Serchhip Town Jt. VC ṭhukhawm chuan District Level NCORD Committee-in ruihhlo tihrem a nih theihna tura Jt.VC-te hma la tura a beisei angin theihtawpa VC-ten hmalak ni se an ti a, Gram Sabha-ah pawh inzirtirna, Drugs awareness campaign buatsaih ṭheuh ni se an ti a,Serchhip town huam chhunga rukruk leh sawrkar/vantlang thil tihchhiat hluar lutuk chungchangah pawh hmalak dan tur relin, Jt.VC hminga thuchhuah siam ni se an ti a, thirchhe leitu leh chawhmeh kharchhawngte hnenah mi rintlakte thil/thlai chauh leisak tura ngenna pek ni se, tiin, ngenna pawisa lote chu an sumdawnna tihtawpsak thlenga ûmzui ni se an ti a, heng sualna thleng thin titawp tur hian VC tinin theihtawp chhuaha hma lak ni se an ti bawk ani.