Dt (3.6.2022) khan Vanramchhuangi, Serchhip Thalai Pawl leh Lunglei Thalai Pawl chuan Serchhip Press Club-ah thuthar lakhawmtute a kâwm a, hetah hian Vanramchhuangi chuan kum 2020 a\anga NHIDCL-ten Mizoram hmun hrang hranga kawngpui an laih vanga leivungin thing leh mau a tihchhiat chu chhiarsen a ni lo tih sawiin, leivung hian kawrte (perenial & seasonal river) pawh 100% a chhilh bo vek a, heng kawrtea leivung inchhekkhawlte hi luipuiah luang lutin chirh a inchhekkhawl a, lui dunga nungcha tam takten an thih phah tih a sawi a, heng zawng zawng hi siam\hat an phut tih sawiin, an hnathawh lai chawlhsan tura an nawrnaah Environment, Forest & Climate Change Department chuan hmun \henkhatah stay order an pe tawh tih a sawi a, hetihlai hian he hna vil (monitoring) kawnga mawhphurtu tura ruat District Bawrhsap-te chu an inthlahdah a, compensation ringawt an buaipui a, a vil zui kawngah an \ha tawk lo hle a ni, a ti.
Ningani-a Tuikum lui hnâr lama kawng laih an tlawh chungchang pawh sawiin, Tuikum luiah leivung tam tak a lut dawn tih chiang a, Zawlpui phaia leilet neitute pawhin kawng laih \an hma-in hemi chungchanga harsatna thleng thei tur chungchanga hmala tura ngenna District Bawrhsap hnena an lo thlen daih tawh laia tun dinhmun an thleng leh si chu hemi kawnga mawhphurtute demawm a tih thu a sawi a, EF&CC Department chuan an tih tur, Stay order an pe tawh a, Stay order ringawt hi a tawk lova, engtinnge kan Environment an tihchhiat hi siam\hat a nih theih nana sawrkar hmalak dan chu enzui zel a ngai dawn a ni a ti.NHIDCL-ten Mizo mipuite hmusit taka min namnul chungchangah hian min zah loh chhan an nei a ni mai a, NGO \henkhatten NHIDCL sum bawm an zenpui nia an hriat thu an sawi a, "State sawrkar phei chu nga sa an ni," tiin a sawi a, hemi chungchang hi an zirchian mek thu leh evidence an neih hunah tlangzarh an tum thu a sawi bawk.Tlawng hnara environment tihchhiat chungchangah National Green Tribnal (NGT)-ah an zualko mek tih a sawi a, Serchhip leh Kei\um inkar kawng laihna leivung chu Zawlpui phaia a liam thlak chuan Mizoram buh leh bal thar chhuahna hmunpui ber Serchhip Zawlpuiin a tuar nasa dawn hle tih a sawi a, hemi chungchang pawh hi High Court-a thlensak nghal hial a duh thu a sawi a, India Judiciary pawh 100%-in Environment lamah a \ang tih sawiin, Ukil-te pawhin an support hle tih a sawi a, hemi kawngah hian state mipuite pawh an \hanharh a \ul hle tih a sawi.He hunah hian STP-in Save Tuikum & Mat Project a kalpuia Project Co-ordinator Laldinpuia leh LTP Chief Organiser Lalduhawma Pachuau-te pawhin NHIDCL-ten kawng leih hna an thawhnaa dân lo ang hna an thawh dan hrang hrangte an tarlang bawk a ni.
Hemi hnu hian Vanramchhuangi ho hian STP leh LTP hruaituten Serchhip District Bawrhsap pisa tualah NHIDCL kawng laihin environment a tihchhiat nasat vanga hma la tura DC phutin lungawi lohna an lantir a, STP chuan Serchhip DC hnenah NHIDCL-ten dân bawhchhia kawng laih hna an thawhnaa action la tura ngenna lehkha an thehlut nghal bawk a ni.
Comments
Post a Comment