Dt 28th June khan Serchhip District Level Monitoring Committee on Implementation of JICA on National Highway 54 members te chuan Serchhip district chhunga NH 54 laihzauh hna thawh meka leivung an paih dante endikin,NHIDCL hotute leh an hnuaia contractor ten an hnathawh meka thil fel tawklo awm nia an ngaihte an sawi ho.
Endiktute hian Khumtung atanga tanin Gawar-SCCPL(JV) in Serchhip District chhunga an hnathawh tur chin en hmasain, hetah hian kawng kama Spoil bank pahnih, a thlang lama Tuirini lui awmna chu en ho a ni a. Monitoring Committee te hian heng an spoil bank hman tumte hi pawm theiha an ngaih loh avangin thla hnih chhungin hman tlak hmun dang lo dap turin an hrilh a ni.NHIDCL hnuaia kawnglaih hna thawktu Kram Infra. Construction Company te thawhlam hmun hrang hranga Spoil Bank tura thlan (identified) te tlawhin chumi hnuah Kram Infra Construction te office Conference Hall ah inkawm hona neih zui a ni. He hunah hian Monitoring Committee chuan NHIDCL aiawhte leh an hnuaia contractor te chak taka hna thawk turin an duh tih hrilhin chutihlaiin sawrkar laipuiin ramngaw leh nungchate leh a chhehvel ramte himna atana dan a siamte tha taka an zawm a tul tih an hrilh a. Serchhip- Chhiahtlang By-Pass road bikah pawh environment clearance engmah, hna tan theihna khawp phalna (in principle approval) takngial pawh an la nei lo chu, a ranglama umzui turin an duh thu an hrilh a ni. Clearance an la neih loh avang hian dan anga stay order pawh pek an nih thu an hrilh bawk. Tuna hnathawh mekteah pawh a thawh dan tur ruahmanna awmsa ang ngeia thawka, leivung paihna hmun atana thlanah chauh leivung paih ngei turte, an leivung paih tawhna kalsan ngaite pawh mumal taka a dawlhimna an siam phawt loh chuan tawngpawng chhuahsan an remtihloh thute an hrilh a. Heng leivung paihna hmun hrang hrang umzui dan tur an sawihote hi contractor ten fel fai taka an hmalak zui dan tur an ziah chu Deputy Commissioner ah thla khat chhungin an thehlut ang a, District Level Monitoring Committee te nen a tul anga endik leh tur a ni ang.Monitoring team te hi Serchhip bawrhsap mawhphurhna chelh mektu Pu Lalmuansanga Ralte, MCS, Addl. DC in a hova, Member Secretary Pu Lalbiakchama Chawngthu, DFO, Thenzawl te, Mizoram Pollution Control Board aiawhin Dr. Lalramnghaki Pachuau, Scientist B te, Information & Public Relations Department aiawhte, Sub Headquarters YMA hnuaia Vigillance & Monitoring Committee aiawh te, NHIDCL aiawhte leh Contractors hote an tel a ni.
Comments
Post a Comment