Dt 26th April, 2022 khan E. Lungdar Thangburha Hall ah Azadi Ka Amrit Mahotsav lawmna kal zel hmalakna peng pakhat atana Ministry of Health & Family Welfare in ruahmanna a siam angin E. Lungdar leh a chhehvel khuate tan Block Level Health Mela buatsaih a ni.
A hawnna inkhawm tawiah khuallian Pi Nazuk Kumar, IAS, Serchhip Bawrhsap chuan, E. Lungdar leh a chhehvel mipuite tana Health Mela buatsaih a ni chu lawmawm a tih thu sawiin Serchhip District chhunga daktawr thiam ber berten inentirna an buatsaih lai hun tha lo hmang tangkaia, a mamawh apiangten lo pan ngei turin mipuite a chah a. India ram pumah hetiang hriselna kutpui hi kalpui mek a ni a, inentirna mai nilovin hrisel tura mipuite nunkawng dik inzirtirna hun atana buatsaih a ni.
Natna tam tak lakah hian awlsam taka inven theih a ni a, mipuiten nunphung hrisel leh thianghlim lam kan uar deuh deuh a tul hle. Natnate hi hma taka hmuhchhuah chuan enkawl dam a awlsam zawk thin avangin rang taka damdawiin pan nachang hriat a pawimawh thin hle, a ti a. Tin, health insurance scheme tha tak sawrkarin a kalpui mek bawk a, heng insurance te hi tih nachang kan hriat a pawimawh hle a ni, a ti bawk. Pi Nazuk Kumar hian sawrkarin mipuite hriselna atana hma a lakna hrang hrang leh tunhnaia chung hmalakna district chhunga kalpuite leh hmachhawp hnaivai awm mekte a tarlan bakah Covid19 hripuiin min la chim renga, mipuiten vaccine lak lamah tan lo laa, himna dan (CAB) te tha taka lo zawm zel tura chahin; Mizoram chu a thianghlim avangin mipuiten nun phung hrisel kan zawh phawt chuan vantlang hriselna lamah dinhmun duhawm takah kan ding thei a ni a ti a ni.
A hawnna inkhawm hi Dr. Lalngaihawmi Chhangte, District Surveillance Officer in a kaihruai a ni.
Vawiin Health Mela ah hian inentirna leh test chi hrang hrang bakah Health Insurance Scheme leh hriselna lam kaihhnawih registration pawimawh dangte pawh mipuite tan chhawpchhuah a ni a, E. Lungdar leh a chhehvel khuaa mipuiten an hlut hle a ni.
He hriselna kutpui hi National Health Mission, Health & Family Welfare Department Mizoram bak ah Education Department, DIPR, Women and Child Development, Rural Development, Sports & Youth Affairs, Ayush, Food Safety, Urban Development and Poverty Alleviation(UD&PA) leh Art & Culture Department te nen tangkawpin an buatsaih a ni a. Hapta liam ta April ni 18 ah khan Chhingchhip Community Hall ah Serchhip Block Health Mela hi buatsaih a lo ni tawh a ni.
Comments
Post a Comment