Serchhip-ah 'District Community Resource Group' din tur chungchang rel a ni

Lawma Ralte • October 23, 2026 • Comments

 Vawiin Dt. 23rd Oct 2026 khan Bawrhsap Pu Paul L. Khuma hovin Serchhip District Community Resource Group (D-CRG) din thar tur chungchang sawi hona DC Meeting Hall-ah neih ani a,Meeting-ah hian Pu Joseph Lalnunmawiia, Assistant Director chuan D-CRG din chhan leh a kalphung turte a sawifiah a. D-CRG chu HIV kai te, ruihhlo ngawlvei te, mahni inzuar thin te leh sex lama harsatna nei ten sawrkara an harsatna an thlen theihna tur leh an dinhmunte chawikan/siam that a nih theih nana district level-a hmalakna tur a ni a. Community tih hian PLHIV (HIV vei te), FSW (Female Sex Workers), MSM (Men who have Sex with Men) leh PWID (People Who Inject Drugs) te a huam a ni.


He thutkhawmah hian Community-te harsatna hrang hrang - OST Centre-a damdawi indaih loh leh harsatna dang awm thei te, Syringe inhman tawm avanga HIV kai darh zel tur ven dan tur te, Sex Workers te harsatna tawh hrang hrang te, ruihhlo ngai ten hnathawhna leh eizawnna kawnga harsatna an tawh te, Jail chhunga awm te dinhmun te leh mite thinhrik (stigma) leh endawng (discrimination) an tawh thinna te sutkian dan turte rel niin,Serchhip Bawrhsap Pu Paul L. Khuma chuan harsatna neiten he Community chungchang an hriat chian theih nan te, awlsam zawka an harsatnate an thlen theih dan turtea chak zawka hmalak a nih tur thu a sawi a. Awareness uar lehzuala kalpui a, centre hrang hrangte heng mite tana chhenfakawm zawka din thar tura hmalak tur a nih thu a sawi bawk.

He hunah hian Addl. DC Pi Dorothy Muansangi, Dy. CMO Dr. Lallawmkimi Chhakchhuak leh sawrkar official dangte bakah Community aiawhte an tel a ni.