'CM’s Tourist Destination Challenge' chungchang Serchhipah thukhawm a ni

 Vawiin Dt.26th October, 2026 khan Deputy Commissioner Pu Paul L. Khuma hovin Mizorama Tourism hmasawnna tura hmalakna, District hrang hrang tana inelna 'Chief Minister's Tourist Destination Challenge' chungchang sawi hona DC Meeting Hall, Serchhip-ah neih a ni.

Meeting-ah hian SDC Pu Vanthangpuia'n CM Tourist Destination Challenge kalphung tlangpuite a sawi fiah a. Serchhip District-a Tourism tih hmasawnna tur atana hmunhma tha tak takte - Zawlpui Zaua Sunflower Festival huaihawt theihna tur hmun te, Bawngchawm - Zawlpui Paragliding tih theihna te, Nagar Van (En tlang), Kawlri Tlang Cultural Heritage Centre te leh Adventure Tourism tih hmasawnna tura hmunhma tha tak tak awmte sawi ho niin, he Challenge atan hian Serchhip District atangin 'Sunflower Festival', Serchhip Zawlpuia neih theih tur chu thlan chhuah a ni a, hlawhtling taka kalpui a nih theih dan tur hrang hrangte sawi ho nghal a ni.

Hemi atan hian DPR siam niin November 25-27 chhungin presentation pek a ni dawn a. He Challenge-ah hian lawmman - pakhatna District tan cheng nuai 2, pahnihna cheng nuai 1.5 leh pathumna cheng nuai 1 te a awm dawnin,Vawiin meeting-ah hian SDO (Sadar), DAO, DIPRO, khawtlang hruaitute, Zawlpui Zaua loneitu FMC aiawh te, Govt. Serchhip College zirtirtu te, MJA President, Mizoram Aerosport Association Sub-Hqrs. President leh Adventure lama thawhhlawk tak Pu Zira PC te an tel a ni.