Ramchhung hmundangte rualin Serchhip-ah Final Electoral Roll tlangzarh a ni

 Serchip district-ah Electoral Roll endik leh siam thatna Special Intensive Revision (SIR) 2026 hlawhtling taka neih a nih hnuin, vawiin Dt 7th Sept 2026  khan Serchhip District Election Officer, Pu Paul L. Khuma chuan Electoral Roll thar ber 'Final Electoral Roll' chu DC Meeting Hall-ah a tlangzarh.

Election Officer Pi Lalchhanhimi hnen atangin Electoral Roll thar buatsaihna atana Serchhip District-a constituency pathum - 26 Serchhip AC, 27 Tuikum AC leh 28 Hrangturzo AC ahtea Special Intensive Revision (SIR) kalpui dan leh hmalakna hrang hrangte ngaihthlak a ni a. Final Electoral Roll-ah hian elector 54,916 awmin heng zinga 26,496 chu mipa an ni a; 28,420 chu hmeichhia an ni. 26-Serchhip-ah mi 20,979 awmin an tam ber a, 27-Tuikum-ah 17,251 leh 28-Hrangturzo-ah 16,686 te an awm a ni. Heng bakah hian Service Voters mi 352 an awm bawk a ni.

July 4, 2026 khan Draft Electoral Roll tarchhuah a lo ni tawh a, siamthat/chinfel ngai chinfelna 'Claims & Objection' hun hawn nghal niin, district chhunga polling station 88-ahte July ni 22 atanga August 10, 2026 chhung khan Hearing neih a ni a; discripency leh no-maping case 7054 bakah inziahluh thar dilna te, siamthat leh tihdik ngai case chi hrang hrangte chinfel niin, elector 1,462 belh an ni a, 726 paih an ni thung. A pumpuia voter/elector pun belhna zat hi 736 (1.36%) niin heng zinga 406 chu mipa an ni a, hmeichhia 330 an ni.

District Election Officer Pu Paul L. Khuma chuan SIR 2026 tluang taka zawh a nih theih nana thawktu zawng zawng, political party-te, NGO-te, BLO-te, BLO Supervisor-te leh official dang zawng zawngte chungah lawmthu a sawi a. Electoral Roll thar hi tlangzarh nghalin ERO leh AERO te, Political Party hrang hrangte hnenah a sem nghal a ni.