VAWIIN (DT.09thJUNE2026) NILENG KHAN SERCHIP BIALTU MLA LEH MIZORAM CHIEF MINISTER NI BAWK PU LALDUHOMA'N ALIMCO HMANRAW SEMNA TELPUI IN, DISTRICT PLAN & PROJECT MONITORING SYSTEM A HAWN BAKAH, KAWNGPUI THAR 2 LEH LAND IMPROVEMENT TE HAWNGIN, 'MLA CUP 2026' FINAL A HMANPUI BAWK

 "Hun tiam ral hmaa quality tha taka hna thawk zo thei Evergreen Construction & Consultancy chungah kan lawm a. Hetiang Firm hi chawimawi ang u" _ Chief Minister. 

Mizoram Chief Minister Pu Lalduhoma chuan vawiin nileng khan a bial Serchhip tlawhin, Artificial Limbs Manufacturing Corporation of India (ALIMCO) ten a mamawhtu mi 211 hnena an nitin hmanraw mamawh 1427 an semna a telpui a, Deputy Commissioner leh NIC te tangkawpin an siam District Plan & Project Monitoring System thar a hawng a, Bawngchawm Paragliding Take-Off tlang panna kawngpui tihzauh leh PCC thar te, Zawlpui leh a chhehvel zau inkalpawhna kawngpui tihzau leh PCC tharte a hawng bawk a. Tlai lamah Serchhip bial MLA Cup Final Programme a hmanpui bawk a ni.

Chief Minister hian Serchhip DC Conference Hall-ah Serchhip DC leh ALIMCO tangkawp ten an kalpui, pianphunga rualbanlo te, ramtuileilo leh kum upa, an chetvelna atana ALIMCO hmanraw siam mamawhtu mi 211 te hnena bungraw hlanna telpuiin, Hmanraw thar dawngtute lawmpuiin, heng an mamawh thilte an dawn theih nana hma latu ALIMCO leh DC chungah lawmthu a sawi a,Chief Minister chuan, kan duhthlanna vang ni lovin, kan pianpui tisa lama kim lohna emaw harsatna kan nei thei a, fuke kim biaia kan pian hnu pawhin eng emaw vanduaina avangin kan taksaah kim lo leh fel lo a awm thei bawk a. Tin, kan kum a lo tam tak avangin hmanrua eng emaw nena kan nun a tul chang a awm theih thute, Chutiang kara kan awm chuan kan harsatna min sutkiansak thei hmanrua kha an lo pawimawh thu leh Chutiang mite mamawh hmanraw siamtu turin sorkar laipuiin kum 1972 khan ALIMCO hi a din thu sawiin, Mizoramah pawh office rawn hawngin tha takin hma an lak thu a sawi a,Vawiinah Serchhip district khaw hrang hranga miten a zar an zo tak thu leh an thil semte hi a mamawhtute tan a hlut em avangin Mizoram pumpui tuam chhuakin hma la thei se a duh sawiin,DC zawng zawng ten lo ngaihven se a duh thu a sawi bawk.

Vawiin hian Serchhip district chhunga Disabled person(PwD) mi 28 leh kum lama upa, mi 183, an vaiin mi 211 hnenah hmanraw chi hrang hrang 1,427 zet an sem chhuah niin. An hmanraw pek chhuah hlut zawng hi Rs. 19.25 Lakh hu a ni.

He mi zawh hian Serchhip DC Meeting Hall-ah Deputy Commissioner leh NIC ten an siam Serchhip District Plan & Project Monitoring System tlangzarhna nei lehin,He system hi State Collaboration Initiatives hnuaia DARPC funded project a ni a,He hunah hian Chief Minister chuan, nikum June ni 18 khan Serchhip DC leh NIC-te tangkawpin an siam, “Vantlang Viltu” (Citizen’s Eye) an lo hawn tawh thu leh Vawiinah District Plan & Project Monitoring System kn han tlangzarh leh thei ta Hetiang thil tha tak tak ngaihtuah chhuaktu Serchhip DC leh a thawhpuite chungah lawmthu a sawi a ni.

He system thar hian Serchhip district hmasawnna tur in thawhhona a tichak dawn thute, data tharlam ber ber kan nei reng thei dawn bakah an tangkaipui hle dawn thu te,Sorkarin Convergence a kalpui uar chhoh zel karah  DC kaihhruaina hnuaiah inhretawn vekin kal tura chahin, DC pawh  thunei taka awm se a duh thu leh Inhriatsak tawn zela hmalakna hian Project inthuah tur a titlem bakah sum leh pai, hun leh tha kan save zawk a ni, a ti bawk.

CM chuan,Digital Service hian sorkar hnathawkte leh mipuite hi awlsamna min pek ve ve thu sawiin,a mimal duhdanah phei chuan, Mizoram hi Digital State-a siam a duh thu te, Mipui kan la tlem a, ziak leh chhiar thiam kan tam a, digital state nih hi chuti taka harsa niin ka ring lo tiin, Department zawng zawng hian mipuiten an va dawr theihna chi, an Business theuh kha Digital Platform siam vek se, digital state kan ni titih der mai dawn ani ati a, Private Firm rawih man a lo to a nih pawhin, sorkar anga an thawhpui theih; ICT te, Mizoram e-Governance Society te leh NIC te kan neih thu leh Kan vei chuan kan tih theih vek ka ring a ni, a ti bawk.

DC Office lama hun a hman zawh hnu hian  Chief Minister hian Serchhip Bawngchawm tlanga Paragliding thlawhchhuahna hmun (Take off Point) a panna  panna kawngpui thar PCC a siam thar leh Mat kam Zawlpui leh a chhehvel zau hrang hrangte panna kawngpui PCC siam thar hawnna hun hmang zui lehin,

Chief Minister chuan, Paragliding Take off Hill panna kawngpui te, a Landing panna kawngpui, Zawlpui leh a chhehvel zau hrang hrang link road ni nghal bawk te an lo hawng thei ta chu  Serchhip leh Mizoram tana hmasawnna lawmawm tak, lungte pakhata Sava pahnih vawmthlakna a ni ati a,he lai hmun hi India ram mai ni lovin, khawvel huapa Paragliding Sports neihna hmunhma tha a tling anih thu leh  Mizoram tan chuan - Pathian thilthlawnpek hmun a nih thute, A hlutna ang taka kan hman thiam hian min petu Pathian pawh a lawm  a rin thu a sawi a,he kawng siam hna thawktu-contractor, Evergreen Construction & Consultancy ten a zawh hun tura bituk thlen hma kum khat vel zet a la awmah,Quality tha taka hun tiam zatve a hna thawk zo leh  PWD ten Letter of Appreciation an hlan awm chhun an ni hial mai chu lawmawm atih thu sawiin,Hetiang contractor hian chawimawi an phu a ni, a ti a,a panna kawngpuite a lo that takah chuan Mizoramin International Sports Event kan huaihawt theih - Paragliding Sports hi inthlahrung lo takin kan huaihawt fo thei tawh dawn a ni tiin,Heng kawngte hian Paragliding ringawt hisapa siam nih loh thu leh  a take-off tlang, Bawngchawm tlangah  Bawngchawm Livestock Society ten ran an vulh thu len khawthawnna tlaka hmunhma nuam anih tel bawk thu sawiin,Zawlpui leh a chhehvel zau kawngte pawh kuthnathawktute hmakhua ngaihtuahna vanga siam an nih thu leh  Kuthnathawktu chhungkaw tam takten an chhawr dawn thu leh  kan ram economy tana thil tangkai a nih thu tarlangin,Zawlpui phai a Paragliding Landing site khu chuan a zar a lo zo ve chauh zawk a ni, a ti bawk.

Paragliding Take Off hmunhma panna kawng thui zawng hi 4.70 km niin, widening thui zawng hi 260 meter a ni. A kawng zau zawng (formation width) hi meter 5.50 a ni a, a kawng chhuat phah (pavement) zau zawng hi meter 3 niin,A kawng chhuat phah (pavement) hi Granular Sub Base (GSB) 125 mm a chhah phah a nih hnuah Plain Cement Concrete (PCC) 100 mm M25 grade-a phah vek a ni bawkin, Contractor Agreement Amount chu Rs. 3,45,63,310 a ni.

Mat kam zauhote inkalpawhna kawng thui zawng hi 11.20 km ni bawkin,A kawng zau zawng (formation width) hi meter 5.50 a ni a, a kawng chhuat phah (pavement) zau zawng hi meter 3 a zau niin A kawng chhuat phah (pavement) hi Granular Sub Base (GSB) 125mm a chhah phah a nih hnuah Plain Cement Concrete (PCC) 100mm M25 grade-a phah vek a ni bawk a,Land improvement hi hmun hrang hrang – Zawlpui zau, Lumtui zau, Lau zau, Lathei zau, Zuangleng zau leh Chhiahtlang zau ah 3.03 hectare a zau ah thawh tel ni bawkin,Contractor Agreement Amount hi Rs. 9,63,30,359 a ni bawk. 

Heng hna pahnihte hi NABARD sum hmanga thawh niin contactor hi Evergreen Construction & Consultancy, Khatla, Aizawl an ni a. Hna hi a zawh hun tura bituk aia kum khat zeta hmaa a zawh avangin PWD Serchhip Division chuan Evergreen Construction & Consultancy neitu Pu J. Vanlalliana hnenah hian Letter of Appreciation an hlan a ni bawk ani. 

Chief Minister Programme hnuhnung berah hian Serchhip Sports Complex-a 'Serchhip MLA Cup 2026' kharna inkhawm  telpui leh in, Thusawiin Pu Lalduhoma chuan, Football hi Mizo thalaite tana eizawn theihna remchang infiamna a nih thu leh  Khawvel ngaihsan rawn Sports Discipline  niin tunah ngei pawh kan thalai tam takten eizawn nan an hmang mek a ni ati a, Kan ramah ruihhlo a hluar avangin ruihhlo laka kan inven theihna remchang tak chu Sport hi a nih thu leh  Ruihhloa tlu lut lem lote tan pawh infiamna hi kan taksa leh rilru hriselna hnar nih thu tarlangin, Infiamna hian  inpawhna tha zawk min pe a, midangte nena thawhho dan min zirtir a. Hlawhtling tura kan rilru leh taksa hman kawp dan min zirtir a. Chak dan min zirtir a, chak loh dan pawh min zirtir tho va. Kawng tinrengin infiamna hian nun kawng tha min zirtir thu te a sawi bakah,Kan thalaite hian infiamna hi uar ila, talent nei thaten eizawn nan hmang se a duh thu a sawi bakah 'MLA Cup' pawh hi infiamna in thil tha min pekte hre reng chunga buatsaih a ni tiin,MLA Cup-a tel VC team 23 te chungah lawmthu a sawi bawk a ni.

Final-ah hian New Serchhip South VC Team leh  Serchhip Chanmari VC team te an intum in  3-1 in New Serchhip S VC Teamte hi an champion  ani.